ڈیرہ غازی خان میں سیلابی ریلوں کا انتباہ جاری

قدرتی آفات سے نمٹنے کے قومی ادارے نے آج سے کل صبح تک ڈیرہ غازی خان میں رود کوہی سیلابی ریلوں کا انتباہ جاری کیا ہے ۔

این ڈی ایم اے کے مطابق آئندہ بارہ گھنٹے کے دوران کل صبح آٹھ بجے تک درمیانے درجے کا سیلاب متوقع ہے ۔

لوگوں سے کہاگیا ہے کہ وہ تازہ ترین موسمیاتی صورتحال سے آگاہ رہنے کیلئے اس سے متعلق خبروں پر نظر رکھیں۔

عوام سے کہاگیا ہے کہ وہ سیلاب سے متاثرہ علاقوں میں سفر کرنے سے گریز کریں اور سیلاب سے متاثرہ علاقوں کے بجائے متبادل راستے استعمال کریں۔

این ڈی ایم اے نے تمام متعلقہ محکموں کو ہدایت جاری کی ہے کہ وہ سیلاب اور شدید موسمیاتی صورتحال کے ممکنہ اثرات سے بچنے کیلئے احتیاطی تدابیر اختیار کریں۔