پی ٹی آئی میڈیا کوآرڈینیٹر احمد وقاص جنجوعہ کی دہشت گردی کے مقدمے میں ضمانت منظور

تحریک انصاف کے انٹرنیشنل میڈیا کوآرڈینیٹر احمد وقاص جنجوعہ کی دہشت گردی کے مقدمے میں ضمانت منظور ہوگئی۔

جسٹس میاں گل حسن اورنگزیب اور جسٹس بابر ستار پر مشتمل اسلام آباد ہائی کورٹ کے ڈویژن بینچ نے کیس کی سماعت کی ، جس میں عدالت نے پی ٹی آئی کےانٹر نیشنل میڈیا کوآرڈینیٹر احمد وقاص جنجوعہ کی دہشت گردی کے مقدمے میں درخواست ضمانت بعد ازگرفتاری منظور کرلی۔

دوران سماعت احمد وقاص جنجوعہ کی اہلیہ اپنے وکیل کے ساتھ عدالت میں پیش ہوئیں۔ وکیل نے اپنے دلائل میں بتایا کہ احمد وقاص کو گھر سے اٹھایا گیا اور کلاشنکوف برآمدگی کا مقدمہ درج کیا گیا۔ ایف آئی آر کا بعد میں علم ہوا۔ 2 روز حبس بے جا میں رکھا گیا۔

جسٹس میاں گل حسن اورنگزیب نے استفسار کیا کہ یہ کوئی میڈیا سے ہیں؟، جس پر وکیل نے جواب دیا کہ میڈیا سے نہیں،پی ٹی آئی کے انٹرنیشنل کوآرڈینیٹر ہیں۔ عدالت میں کیس کیا تو مقدمے کا علم ہوا اور احمد وقاص سے متعلق بھی معلوم ہوا۔ رؤف حسن اور دیگر کے ہمراہ گرفتاری ڈالی گئی۔ رؤف حسن ضمانت پر رہا ہو گئے ہیں۔

عدالت نے سرکاری وکیل سے استفسار کیا کہ آپ کیا کہتے ہیں؟ جس پر سرکاری وکیل نے جواب دیا کہ 300 گرام بارود برآمد کرنا ہے،کلاشنکوف برآمد کرنا ہے۔ استدعا ہے کہ درخواست ضمانت مسترد کی جائے۔

بعد ازاں عدالت نے دلائل سننے کے بعد احمد وقاص جنجوعہ کی درخواست ضمانت بعد ازگرفتاری منظور کرلی اور انہیں رہا کرنے کا حکم دے دیا۔