منکی پاکس کی روک تھام کیلئے ائیرپورٹس پر نئی گائیڈ لائنز جاری

کراچی: پاکستان میں منکی پاکس کے پھیلاؤ کو روکنے کے لیے ملک بھر کے ائیرپورٹس پر سخت اقدامات شروع کردیئے گئے ہیں۔ سول ایوی ایشن اتھارٹی نے اس سلسلے میں نئی گائیڈلائنز جاری کی ہیں جن کے تحت تمام ائیرلائنز، اسٹاف اور گراؤنڈ ہینڈلنگ کمپنیوں کو ایس او پیز پر عمل کرنا ہوگا۔

سول ایوی ایشن اتھارٹی (سی اے اے) کی جانب سے نئی گائیڈ لائن کے مطابق تمام مسافروں کی ائیرپورٹس پر تھرمل اسکریننگ کی جائے گی۔ ہوائی جہازوں کو لازمی طور پر ڈس انفیکٹ کیا جائے گا۔ تمام ائیرلائنز اپنے مسافروں کو ماسک فراہم کریں گی۔محکمہ بارڈر ہیلتھ سروسز مسافروں کی اسکریننگ اور آئسولیشن اقدامات پر عمل درآمد کرائے گا۔

 اس کے علاوہ بیرون ملک سے آنے والی تمام پروازوں کے عملے کی بھی اسکریننگ کی جائے گی۔ ایف آئی اے مسافروں کی تفصیلات ہیلتھ اتھارٹیز کو فراہم کرے گا اور ہیلتھ کلیئرنس کے بغیر غیر ملکی کو آن اریول ویزا جاری نہیں کرے گا۔

گائیڈ لائنز کےمطابق مسافروں کے لگیج سے متعلق کسٹم کو ہیلتھ حکام سے کلیئرنس لازمی لینی ہوگی۔درآمد اشیاء کی چیکنگ کے لیے کسٹم کے ہمراہ بارڈر ہیلتھ حکام جانچ پڑتال کرسکتے ہیں۔اے ایس ایف ائیرپورٹس پر قائم آئسولیشن ایریاز پر سکیورٹی فراہم کرے گا۔

صحت کے ماہرین کا کہنا ہے کہ یہ اقدامات منکی پاکس کے پھیلاؤ کو روکنے میں بہت اہم ہیں۔ انہوں نے کہا کہ حکومت کو عوام کو اس بیماری کے بارے میں آگاہی دینا چاہیے اور لوگوں کو احتیاطی تدابیر پر عمل کرنے کے لیے کہنا چاہیے۔