وزیرتجارت نے آئیڈیاز 2024ء نمائش کی سافٹ لانچنگ کردی

وزیرتجارت جام کمال خان نے آج آئیڈیاز 2024ء نمائش کی سافٹ لانچنگ کی۔

 بدھ کی شام اسلام آباد میں اس حوالے سے منعقدہ تقریب سے خطاب کرتے ہوئے انہوں نے کہا کہ پاکستان کی دفاعی صنعت نہ صرف ملک کی مسلح افواج کی ضروریات کو پورا کر رہی ہے بلکہ مناسب عسکری سازوسامان کی تجارت کے ذریعے مسابقتی بنیادوں پر اپنی مصنوعات برآمد کرنے کی صلاحیت بھی رکھتی ہے۔

جام کمال نے کہا کہ آئیڈیاز دنیا بھر سے دفاعی نمائش کنندگان، اعلیٰ سطح کے دفاعی وفود،تجزیہ کاروں اور تجارتی نمائندوں کے لئے ملاقات کی ایک بہترین جگہ بن گیا ہے۔

انہوں نے کہا کہ آئیڈیاز بہتر ہم آہنگی، تعلقات، دفاعی صنعت کے دائرئہ کار اور دفاعی صنعت کو درپیش چیلنجز سے نمٹنے کے لئے حل تلاش کرنے کا بہترین موقع فراہم کرتی ہے۔

 اس موقع پر خطاب کرتے ہوئے ڈیفنس ایکسپورٹ پروموش آرگنائزیشن کے ڈائریکٹر جنرل میجر جنرل اسد نواز خان نے کہا کہ آئیڈیاز عالمی امن، استحکام اور قوموں کے درمیان ہم آہنگی کے لئے مشترکہ وژن ہے۔

انہوں نے کہا کہ پاکستان دفاع اور تحقیق، سائنسی ترقی، مینوفیکچرنگ اور اپنی دفاعی صلاحیتوں اور برآمدات کو مضبوط بنانے کے لئے مشترکہ منصوبے شروع کرنے کے لئے عالمی پلیٹ فارم کے طور پر ابھرنے کی صلاحیت رکھتا ہے۔