پاکستان اسٹاک ایکسچینج میں تیزی، انڈیکس 82 ہزار کی سطح عبور کر گیا

پاکستان اسٹاک ایکسچینج میں کاروباری ہفتے کے آخری روز تیزی کا رحجان دیکھا گیا ہے، آج بینچ مارک کے ایس ای ہنڈرڈ ایڈیکس 770 پوائنٹس اضافے کے ساتھ 82 ہزار کی نئی بلند ترین سطح پر پہنچ گیا ہے۔

پی ایس ایکس کی ویب سائٹ کے مطابق صبح 11 بجے بینچ مارک 1.10 فیصد اضافے کے ساتھ 82 ہزار 354 پوائنٹس پر جا پہنچا۔

سیمنٹ، کمرشل بینکوں، فرٹیلائزر اور ریفائنری سمیت منتخب شعبوں میں خریداری دیکھی گئی۔ ایم ای بی ایل، یو بی ایل، اینگرو، ایف ایف سی سمیت انڈیکس ہیوی اسٹاک میں مثبت رجحان رہا۔

چیس سیکیورٹیز کے ڈائریکٹر ریسرچ یوسف ایم فاروق نے اس رجحان کو گزشتہ روز حکومتی بانڈز کے شرح منافع میں کمی سے منسلک کیا۔

ان کا کہنا تھا کہ مارکیٹ توقع کر رہی ہے کہ مہنگائی اور شرح سود میں تیزی سے کمی ہوگی۔

گزشتہ روز پاکستان انویسٹمنٹ بانڈز کے تین سالہ مدت کے شرح منافع میں 335 بیسس پوائنٹس کی نمایاں کمی کی گئی جبکہ حکومت نے ہدف سے 50 فیصد کم قرض لیا۔

ماہرین کا کہنا ہے کہ کچھ مثبت تبدیلیاں اس لیے سامنے آئی ہیں کیونکہ سرمایہ کار بین الاقوامی مالیاتی فنڈ (آئی ایم ایف) کے ایگزیکٹو بورڈ کی منظوری کی توقع کر رہے ہیں۔

آئی ایم ایف بورڈ 25 ستمبر کو پاکستان کی 37 ماہ کی توسیعی فنڈ سہولت (ای ایف ایف) کو ایجنڈے میں شامل کرے گا۔