بانی پی ٹی آئی کو ملک پر دوبارہ مسلط کرنے کے لیے مہم چلائی جارہی ہے، احسن اقبال

وفاقی وزیر منصوبہ بندی وترقی احسن اقبال نے سابق وزیراعظم عمران خان پر سخت تنقید کرتے ہوئے کہا ہے کہ انہیں ملک پر دوبارہ مسلط کرنے کے لیے مہم چلائی جارہی ہے۔

ظفر وال  میں نیوز کانفرنس سے خطاب کرتے ہوئے انہوں نے کہا کہ حال ہی میں یروشلم پوسٹ میں ایک مضمون شائع ہوا، یہ تیسرا مضمون ہے جو بانی پی ٹی آئی کی حمایت میں شائع ہوا ہے،اسرائیلی اخبار کے مطابق بانی پی ٹی آئی پاکستان میں واحد قابل قبول شخص ہیں۔

احسن اقبال نے کہا کہ لوگوں کو گمراہ کرنے کے لیے سوشل میڈیا پر زہریلا پروپیگنڈا کیا جا رہا ہے، بانی پی ٹی آئی کو دوبارہ مسلط کرنےکے لیے مہم چلائی جارہی ہے، ایٹمی قوت بننےکے بعد پاکستان صیہونی لابی کی آنکھوں میں کھٹک رہاہے، پاکستان کو معاشی، سیاسی اور سماجی طور پر کھوکھلا کرنے کی سازش کی جارہی ہے۔

ان کا کہنا تھا کہ بانی پی ٹی آئی نے 2013 سے نفرت اور تقسیم کی سیاست کر رکھی ہے، نفرت کی سیاست نےپاکستان میں بدترین تقسیم پیدا کی، مسلح افواج کے خلاف وہ مہم چلائی گئی جو دشمن بھی نہیں چلا سکتے۔

وفاقی وزیر نے کہا کہ بانی پی ٹی آئی نے میئر لندن کے الیکشن میں پاکستانی نژاد کی کھلم کھلا مخالفت کی، لوگ اب سمجھ گئے ہیں پروجیکٹ بانی پی ٹی کے پیچھے کون ہے، صیہونی لابی ہمیشہ پاکستان کی ایٹمی صلاحیت کو نشانہ بناتی ہے۔