طالبہ سے مبینہ زیادتی:دوسرے روز بھی احتجاج ، طلبہ کا پنجاب اسمبلی کے باہر دھرنا

لاہور کے نجی کالج کے طالب علم طالبہ سے مبینہ زیادتی کے خلاف دوسرے روز بھی احتجاج کر رہے ہیں۔

تفصیلات کے مطابق نجی کالج کی طالبہ سے مبینہ زیادتی کے خلاف حکومتی یقین دہانیوں اور تحقیقاتی کمیٹی کے اعلان کے باوجود طلبہ دوسرے دن بھی احتجاج کے لیے سڑکوں پر نکل آئے ہیں۔ 

لاہور میں طلبہ نے احتجاج کیا اور چیئرنگ کراس مال روڈ پر پنجاب اسمبلی کے سامنے دھرنا دے دیا جب کہ پنجاب اسمبلی کے سامنے پولیس کی بھاری نفری بھی موجود ہے۔ 

لاہور کے ساتھ ساتھ پنجاب کے دیگر شہروں میں بھی کالج کے طلباء احتجاج میں شامل ہو گئے ہیں۔ ملتان میں بوسن روڈ پر طلباء نے کالج کی عمارت میں توڑ پھوڑ کی جس پر پولیس نے لاٹھی چارج کرتے ہوئے درجنوں طلباء کو گرفتار کر لیا۔

جہانیاں میں طلباء کی جانب سے موٹر سائیکل ریلی نکالی گئی، جبکہ ظفروال میں طلباء نے ٹائروں کو آگ لگا کر ٹریفک بلاک کر دی، انصاف اور معاملے کی شفاف تحقیقات کا مطالبہ کیا۔

خیال رہے کہ وزیراعلیٰ پنجاب مریم نواز نے معاملے کی تحقیقات کے لیے چیف سیکریٹری کی سربراہی میں 6 رکنی تحقیقاتی کمیٹی تشکیل دی تھی۔ جب کہ پولیس کی تفتیش کے مطابق واقعے میں کوئی صداقت نہیں اور سیکیورٹی گارڈ واقعے کی تردید کر رہا ہے جب کہ زیادتی کا کوئی ثبوت نہیں ملا۔