سندھ اور خیبر پختونخوا  میں پولیو کے نئے کیسزسامنے آ گئے،مجموعی تعداد 48 ہوگئی

خیبر پختونخوا اور سندھ میں پولیو کے مزید دو  نئے کیسزسامنے آ گئے ہیں، جس سے ملک میں پولیو کئے مجموعی کیسز کی تعداد 48 ہوگئی ہے۔

نیشنل ایمرجنسی آپریشنز سینٹر (این ای او سی) میں پولیو کے خاتمے کے لیے قائم ریجنل ریفرنس لیبارٹری کے ایک عہدیدار کے مطابق لیب نے ’ڈبلیو پی وی ون‘  وائلڈ پولیو وائرس ٹائپ ون کی تصدیق کی ہے۔

صوبائی محکمہ صحت کے مطابق ڈیرہ اسماعیل خان کی تحصیل درزندہ کی یونین کونسل بہران میں 28 ماہ کے بچے میں پولیو وائرس کی تصدیق  ہوئی ہے۔ قومی ادارہ صحت اسلام آباد نے بھی متاثرہ بچے میں پولیو وائرس کی تصدیق کردی ہے۔

واضح رہے اس  سے قبل بھی ڈیرہ اسمعاعیل  خان سے پولیو کے دو کیس سامنے آ چکے ہیں، جبکہ  ملک میں مجموعی طور ہر 48 کیس سامنے آ چکے ہیں۔

این ای او سی لیبارٹری کے عہدیدار کے مطابق ’اب تک بلوچستان سے 23، سندھ سے 13، خیبر پختونخوا سے 10 اور پنجاب اور اسلام آباد سے پولیو کا ایک، ایک کیس رپورٹ ہوا ہے۔

یاد رہے کہ گزشتہ روز سندھ کے ضلع گھوٹکی سے پولیو کیس رپورٹ ہوا تھا، یہ گھوٹکی سے سامنے آنے والا پولیو کا پہلا کیس ہے۔