آرمی چیف کی آسٹریلوی فوج کے سربراہ سے ملاقات،دو طرفہ تعاون کو فروغ دینے کا عزم

آرمی چیف جنرل سید عاصم  منیر سے آسٹریلوی فوج کے سربراہ لیفٹیننٹ  جنرل اسٹیورٹ نے جی ایچ کیو میں ملاقات کی ہے۔
پاک فوج کے شعبہ تعلقات عامہ ( آئی ایس پی آر ) کے مطابق آسٹریلوی فوج کے سربراہ لیفٹیننٹ  جنرل اسٹیورٹ نے جنرل ہیڈ کوارٹر ( جی ایچ کیو ) راولپنڈی کا دورہ کیا اور آرمی چیف جنرل سید  عاصم منیر سے ملاقات کی۔
آئی ایس پی آر کے مطابق آسٹریلوی فوج کے سربراہ کا جی ایچ کیو پہنچنے پر پرتپاک استقبال کیا گیا، اور پاک فوج کے چاق و چوبند دستے نے انہیں گارڈ آف آنر بھی پیش کیا۔
جی ایچ کیو پہنچنے پر آسٹریلوی آرمی چیف نے یادگار شہدا پر پھولوں کی چادر چڑھائی اور پاکستان کے شہدا کو خراج عقیدت پیش کیا۔
آئی ایس پی آر کے مطابق دونوں رہنماؤں کے درمیان  ملاقات میں  باہمی دلچسپی کے امور عالمی اور علاقائی سیکیورٹی  کے امور پر تبادلہ خیال کیا۔ ملاقات میں عالمی اور علاقائی سیکیورٹی کے ماحول پر گفتگو کی گئی۔ 
آرمی چیف نے آسٹریلیا کے ساتھ پاکستان کے تعلقات کی اہمیت کو اجاگر کیا۔ آرمی چیف نے مضبوط دو طرفہ روابط کی تعریف کی اور امن و استحکام کے مشترکہ اہداف کو فروغ دینے میں ان کی اہمیت پر زور دیا۔ دونوں ممالک نے دفاع اور سیکیورٹی کے شعبے میں تعاون کو مزید مضبوط بنانے کے عزم کا اعادہ کیا۔
آئی ایس پی آر نے بتایا کہ لیفٹیننٹ جنرل اسٹیورٹ نے دہشت گردی کے خاتمے میں پاکستان کی کاوشوں کی تعریف کی اور دونوں ممالک کے درمیان دفاعی اور سیکیورٹی تعاون کو مزید گہرا کرنے کے عزم کا اظہار کیا۔