سعودی عرب نے ہر مشکل وقت میں پاکستان کا ساتھ دیا ہے،وزیر اعظم

وزیر اعظم محمد شہباز شریف نے کہا ہے کہ سعودی عرب نے ہر مشکل وقت میں پاکستان کا ساتھ دیا ہے۔
وزیر اعظم شہباز شریف سے ریاض میں سعودی عرب  وزیر برائے سرمایہ کاری نے ملاقات کی، ملاقات میں وزیراعظم نے سعودی ولی عہد کے لیے نیک خواہشات کا اظہار کیا۔
وزیر اعظم نے عرب ممالک کے سربراہی اجلاس کے انعقاد پر سعودی قیادت کو خراج تحسین پیش کیا۔ شہباز شریف نے سعودی عرب میں پرتپاک میزبانی پر سعودی حکومت کا شکریہ ادا کیا۔
شہباز شریف نے سعودی عرب کے ویژن 2030 کی حمایت سے متعلق پاکستان کے عزم کا اظہار کیا اور سعودی عرب کے ویژن 2030 کے حوالے سے سعودی قیادت کی تعریف کی۔
اس موقع پر وزیر اعظم شہباز شریف نے کہا کہ پاکستان اور سعودی عرب کے درمیان برادرانہ تعلقات ہیں اور  سعودی عرب نے ہر مشکل وقت میں پاکستان کا ساتھ دیا۔وزیر اعظم شہباز شریف کا کہنا تھا کہ سعودی ولی عہد سے ملاقات انتہائی مفید رہی۔
انہوں نے کہا کہ سعودی وزیر کا حالیہ دورہ پاکستان اہم سنگ میل تھا۔ نئی سرمایہ کاری کی راہ ہموار ہوئی اور اقتصادی تعاون کو گہرا کیا گیا۔
 اس موقع پر وزیر اعظم شہباز شریف نے کہا کہ سعودی عرب میں مقیم پاکستانی دونوں ممالک کی اقتصادی ترقی میں اہم کردار کر رہے ہیں۔
واضح رہے کہ وزیر اعظم شہباز شریف گزشتہ روز عرب مملاک کے سربراہی اجلاس میں شرکت کے لیے دو روزہ سرکاری دورے پر سعودی عرب پہنچے تھے، وزیر اعظم آج سربراہی اجلاس میں خطاب کریں گے۔