ملک کے بیشتر اضلاع شدید دھند اور اسموگ کی لپیٹ میں، فضائی آلودگی میں لاہور کا پہلا نمبر

پنجاب، سندھ اور خیبرپختونخوا کے کئی اضلاع شدید دھند اور اسموگ کی لپیٹ میں آگئے ہیں۔

خراب فضائی معیار ہونے کے سبب لاہور صبح سویرے آج بھی دنیا اور ملک کا آلودہ ترین شہر رہا جہاں ائیرکوالٹی انڈیکس1045پر دیکھا گیا تاہم صبح 8 بجے لاہور میں ریکارڈ کیے گئے پارٹیکولیٹ میٹرز کی تعداد 910 رہی جبکہ  فضائی آلودگی میں ملتان دوسرے نمبر پر رہا جہاں 806 پارٹیکولیٹ میٹرز ریکارڈ کیے گئے۔

دوسری جانب  شدید دھند اور اسموگ کی وجہ سے موٹروے ایم 4 پنڈی بھٹیاں سے عبدالحکیم تک بند، ایم 4 عبدالحکیم سے شیر شاہ تک بھی بند جب کہ ایم 5 شیر شاہ سے سکھر اور سیالکوٹ موٹروےکو بھی ٹریفک کیلئے بند کردیا گیا ہے۔

پنجاب میں شدید دھند کے باعث کراچی میں بھی ٹرینوں کی آمد رفت میں تاخیر کا سلسلہ شروع ہوچکا ہے۔ کراچی سے سوا 10 بجے پشاور جانے والی خیبرمیل 7 گھنٹے تاخیر کے بعد صبح 5 بجے روانہ ہوئی۔
 
اسی طرح کراچی سے سوا 11 بجے روانہ ہونے والی سکھر ایکسپریس تاحال روانہ نہیں ہوئی۔ ٹرینوں کی تاخیر کے باعث مسافروں کو شدید مشکلات کا سامنا کرنا پڑ رہا ہے، جس کے بعد خیبر میل اور سکھر ایکسپریس کے مسافروں نے کینٹ اسٹیشن پر احتجاج بھی کیا۔

اس کے علاوہ شدید دھند کے باعث 10 سے زائد پر وازیں بھی متاثر ہوئیں جس کے سبب مسافروں کو پریشانی کا سامنا کرنا پڑا۔