تمام باغی گروپوں کو چاہیے کہ ملکر شام میں اقتدار کی منتقلی کو شفاف بنائیں،انٹونی بلنکن

امریکی وزیر خارجہ انٹونی بلنکن  کا کہناہے  کہ شام میں تمام گروپس ملکر پرامن انتقال اقتدار کو شفاف بنائیں۔
وزیر خارجہ انٹونی بلنکن  نے اپنے بیان میں مزید کہا کہ بشارالاسد کی حکومت کے خاتمے کے بعدبعدشامی شہریوں میں مثبت امید پیدا ہوئی، امریکا شامی جنگجو گروپس کے بیانات کو نہایت قریب سے واچ کر رہا ہے، امریکا بیانات کی بجائےعملی اقدامات پر یقین رکھتا ہے، شامی شہریوں کومعاشرتی تحفظ اورحقوق کےحصول کیلئے تحفظات بتانےچاہئیں۔
 جبکہ شام کی موجودہ صورتحال پر کینیڈین وزیر خارجہ کا کہنا تھا بشارالاسد اپنے شہریوں کے خلاف سنگین جرائم کا مرتکب ہوئے، کینیڈا بشارالاسد کو عالمی عدالت میں جرائم پرجوابدہ ٹھہرائے گا۔

جبکہ دوسری جانب روس نے شام کی موجودہ سیاسی صورتحال پر سیکیورٹی کونسل کا ہنگامی اجلاس بلانے کی درخواست کر دی ہے۔

اقوام متحدہ میں روس کے مستقل نائب نمائندے دمتری پولیانسکی نے اس امید کا اظہار کیا ہے کہ فوری طور پر سیکیورٹی کونسل کا ہنگامی اجلاس بلالیا جائے گا۔

اقوام متحدہ میں روس کے مستقل مندوب دمتری پولیانسکی نے مزید کہا کہ اسرائیل کے گولان کی پہاڑیوں پر قبضے اور وہاں اقوام متحدہ کی غیر فوجی علاقے (بفر زون) پر بات کرنا ضروری ہے۔

واضح  رہے کہ بشار الاسد شام میں باغیوں کے قبضے کے بعد طیارے میں اہل خانہ کے ہمراہ روس پہنچ گئے جہاں انھیں سیاسی پناہ دیدی گئی۔