اگر پی ٹی آئی نے مذاکرات کا پیغام بھیجا تو انکار نہیں ہوگا، رانا ثناء اللہ

وزیراعظم شہباز شریف کے مشیر برائے سیاسی امور رانا ثناء اللّٰہ نے کہا ہے کہ اگر پی ٹی آئی نے مذاکرات کا پیغام بھیجا تو ہماری طرف سے انکار نہیں ہوگا، یہ 9 مئی واقعے کی مذمت کیوں نہیں کرتے، کیوں نہیں کہتے کے ان سے غلطی ہوئی ہے۔

رانا ثنا اللہ نے کہا کہ فائنل کال سے پہلے تحریک انصاف سے رابطہ کیا گیا تھا، بانی پی ٹی آئی عمران خان سے رہائی کی بات نہیں ہوئی تھی۔ مسلم لیگ ن نے ہمیشہ مذاکرات کی حمایت کی ہے، جب ہم اپوزیشن میں تھے تب بھی ہم نے میثاق معیشت کی پیشکش کی تھی۔

انہوں نے مزید کہا کہ پاکستان تحریک انصاف نے مذاکرات کے لیے کمیٹی بنائی ہے لیکن بات چیت کا پیغام نہیں دیا، تحریکِ انصاف کا ہمارے لیے ابھی یہی پیغام ہے کہ ہم آپ سے کیوں مذاکرات کریں، اگر پی ٹی آئی نے مذاکرات کا پیغام بھیجا تو ہماری طرف سے انکار نہیں کیا جائے گا۔

رانا ثنا اللہ کا کہنا تھا کہ 9 مئی کو کن کی تنصیبات اور گھروں پر حملہ کیا گیا، انہوں نے آفر کی ہے کہ صدقے دل سے معذرت کریں، پی ٹی آئی والے 9 مئی واقعے کی مذمت کیوں نہیں کرتے، پی ٹی آئی والے کیوں نہیں کہتے ان سے غلطی ہوئی ہے، یہ کہنا کہ 9 مئی کو ہم نہیں تھے، یہ تلخی بڑھانے والی بات ہے۔

ان کا مزید کہنا تھا کہ مدارس رجسٹریشن کا معاملہ بیٹھ کر سلجھایا جاسکتا ہے، مدارس رجسٹریشن کے معاملے میں کوئی ڈیڈ لاک والی بات نظر نہیں آرہی۔ سوسائٹی ایکٹ یا وزارتِ تعلیم سے رجسٹرڈ ہونے سے کوئی فرق نہیں پڑتا۔