بائیو سیکور ببل پروٹوکولز کی خلاف ورزی پر سری لنکا کے تین کھلاڑی معطل

رپورٹ : انس سعید

تفصیلات کے مطابق سری لنکا کرکٹ ٹیم ان دنوں انگلینڈ کے دورہ پرہے جہاں سری لنکا اور انگلینڈ کے مابین تین ایک روزہ اور تین ٹی ٹونٹی میچوں کی سیریز بائیو سیکور ببل میں کھیلی جارہی ہے ۔

سری لنکا کرکٹ نے ایکشن سوشل میڈیا پر وائرل ہونے والی ایک ویڈیو پر لیا جس میں سری لنکن کرکٹر کوشال مینڈس اورنیروشان ڈکویلا پبلک پلیس پر گھومتے نظر آرہے ہیں  دونوں کھلاڑی باہر روڈ پر بیٹھے ہوئے ہیں اور بیٹسمین دانوشکا گوناتھیلاکا بھی ان کے ہمراہ نظر آئے ہیں۔

سری لنکا کرکٹ کی جانب سے جاری کردہ اعلامیہ کے مطابق کرکٹر کوشال مینڈس،  دانوشکا گوناتھیلاکا اورنیروشان ڈکویلا کو بائیو سیکور ببل کے قوانین کی خلاف  ورزی پر معطل کرتے ہوئے کھلاڑیوں کو فوری انگلینڈ سے وطن واپس طلب کر لیا گیا ہے۔ معاملے پر تحقیقات شروع کردی گئی ہیں تحقیقات مکمل ہونے تک تینوں کھلاڑیوں کو تمام طرز کی کرکٹ کھیلنے کی اجازت نہیں ہوگی ۔

بائیو سیکور ببل کے پروٹوکولز کے تحت ببل میں شامل افراد کو باہر جانے اور ان افراد سے ملاقات کی اجازت نہیں ہوتی جو ببل کا حصہ نہ ہوں  ۔

سری لنکا کرکٹ ٹیم درہم کے ہوٹل میں قیام پذیر ہے انگلینڈ اور سری لنکا کے درمیان ایک روزہ سیریز کا آغاز کل سے ہونا ہے۔