کرم میں قیام امن کیلئے فریقین کے درمیان معاہدہ طے 

خیبر پختونخوا  کے ضلع کُرم میں قیام امن کے لیے گرینڈ جرگے میں فریقین کے درمیان معاہدہ طے پا گیا۔
کُرم میں قیام امن کے لیے ہونے والے گرینڈ جرگے میں فریقین نے امن معاہد ے پردستخط کر دیے ہیں، معاہدے کے متن کے مطابق کرم میں اسلحہ استعمال کرنے والے فریق پر جرمانہ عائد کیا جائے گا، 2008 میں طے مری معاہدے پر عمل کیا جائے گا، معاہدے کے تحت فریقین کو اسلحہ جمع کرانا پڑے گا۔
واضح رہے کہ کر م میں امن و امان کے قیام کیلئے 3 ہفتوں سے جرگہ جاری تھا، جرگہ ممبران کی تعداد مکمل نہ ہونے کی وجہ سے گزشتہ روز معاہدے پردستخط نہیں ہو سکے تھے، اب دونوں فریقین معاہدے کے نکات پر متفق ہو گئے ہیں۔

واضح رہے کہ دو ماہ سے زائد عرصے تک جاری رہنے والی کشیدگی میں 200 سے زائد افراد جان کی بازی ہار گئے، جبکہ راستوں کی بندش،اشیائے خوردونوش کی کمی اور مناسب علاج نہ ملنے کے باعث پارا چنار میں 50 سے زائد بچے موت کے منہ میں جا چکے ہیں، فریقین کے درمیان کرم میں قیام امن کے لیے تین ہفتے قبل گرینڈ جرگے کا اہتمام کیا گیا تھا۔