پی سی بی نے 2024ء کے لیے ہال آف فیم کرکٹرز کا اعلان کردیا

پاکستان کرکٹ بورڈ نے 2024ء کے لیے ہال آف فیم کرکٹرز کا اعلان کردیا ہے۔

بورڈ نے 4 سابق ٹیسٹ کرکٹرز مشتاق محمد، انضمام الحق، سعید انور اور مصباح الحق کو ہال آف فیم 2024ء میں شامل کیا ہے۔

پی سی بی ہال آف فیم میں اس سے قبل عبدالقادر، اے ایچ کاردار، فضل محمود، حنیف محمد، عمران خان، جاوید میانداد، وسیم اکرم، وقار یونس، یونس خان اور ظہیر عباس شامل ہوچکے ہیں۔

چیئر مین پی سی بی نے کہا ہے کہ چاروں کھلاڑی پاکستان کی کرکٹ کی تاریخ میں خاص مقام رکھتے ہیں،یہ کرکٹر ہمارے سفیر ہیں پی سی بی انہیں اعزاز دینے پر فخر محسوس کرتا ہے،مجھے امید ہے ہمارے کرکٹرزان عظیم کھلاڑیوں کےنقش قدم پر چلیں گے،ہمارے کرکٹرز نے عالمی سطح پر اپنی مہارت کا لوہا منوایا  ہے۔

انضمام الحق نے 1991ء سے 2007ء تک بین الاقوامی کرکٹ کھیلی اور 1992ء میں ورلڈ کپ جیتنے والی پاکستان ٹیم کے رکن رہے۔ مصباح الحق نے 2001ء سے 2017ء تک پاکستان کی نمائندگی کی اور ان کی قیادت میں پاکستان ٹیم 2016ء میں آئی سی سی ٹیسٹ ٹیم رینکنگ میں نمبرایک پوزیشن پر آئی۔

مشتاق محمد نے 1959ء سے 1979ء تک پاکستان کی نمائندگی کی اور کپتان بھی رہے،1977ء میں ان کی قیادت میں پاکستان نے پہلی بار آسٹریلیا میں اپنا پہلا ٹیسٹ جیتا۔

سعید انور نے 1989ء سے 2003ء تک پاکستان کی نمائندگی کرتے ہوئے مجموعی طور پر 31 سنچریاں اور 68 نصف سنچریاں بنائیں۔ 1996ء، 1999ء اور 2003ء کے ورلڈ کپ میں ان کی تین سنچریاں اور تین نصف سنچریاں شامل تھیں