بانی پی ٹی آئی عمران خان این آر او کے لیے جھک گئے ہیں، عظمی بخاری

 پنجاب کی وزیر اطلاعات عظمیٰ بخاری نے کہا ہے کہ بانی پی ٹی آئی عمران خان این آر او کے لیے جھک گئے ہیں۔

وزیر اطلاعات پنجاب عظمیٰ بخاری نے پریس کانفرنس کرتے ہوئے کہا کہ لاہور میں ترقیاتی کام جاری ہیں اور وزیر اعلیٰ پنجاب مریم نواز خود ترقیاتی کاموں کی نگرانی کر رہی ہیں، دھی رانی پروگرام مریم نواز کے دل کے قریب ہے،انہوں نے کہا کہ سکالر شپ پروگرام سے 30 ہزار بچوں کو تعلیم ملے گی۔ جبکہ ترسیلات زر میں ریکارڈ اضافہ ہوا ہے۔ پاکستان کو نقصان پہنچانے کی کوشش کی گئی اور سول نافرمانی کر کے عالمی مالیاتی ادارے (آئی ایم ایف) کو خطوط لکھے گئے۔

صوبائی وزیر اطلاعات نے کہا کہ علی امین گنڈا پور کی حکومت پر کرپشن کا الزام ہے اور خیبر پختونخوا میں تو ایک وزیر میٹرک فیل تھے، پی ٹی آئی کا پناہ گاہوں والا منصوبہ ناکام ہوا،انہوں نے کہا کہ دوسروں کے لیے اے سی بند کروانے والوں کے لیے مکافات عمل ہے اور بانی پی ٹی آئی سے تو گھر والے بھی نہیں ملنے جاتے۔

عظمیٰ بخاری نے کہا کہ سازش سے اداروں اور ملک کو نقصان پہنچایا گیا، پہلے فائنل کال دی گئی جو مس کال ثابت ہوئی اور پی ٹی آئی والے ڈی چوک چھوڑ کر بھاگ گئے تھے، پی ٹی آئی منفی پروپیگنڈا کر رہی ہے،انہوں نے کہا کہ پی ٹی آئی این آر او کے لیے کوشش کر رہی ہے اور بانی پی ٹی آئی این آر او کے لیے جھک گئے ہیں، پنجاب حکومت سفارش نہیں میرٹ پر کام کر رہی ہے۔