ملتان ٹیسٹ: پہلا دن کے اختتام پر پاکستان کے چار وکٹوں پر 143 رنز

ملتان:ویسٹ انڈیز کیخلاف کھیلے جانے والے پہلے ٹیسٹ میچ کے پہلے روز کے اختتام پر پاکستان نے 4 وکٹوں کے نقصان پر 143 رنز بنالیے۔
پاکستان اور ویسٹ انڈیز کے درمیان 2 میچز پر مشتمل سیریز کا پہلا ٹیسٹ میچ ملتان کرکٹ سٹیڈیم میں کھیلا جا رہا ہے، دھند کی وجہ سے تاخیر کا شکار ہونیوالا میچ دوبارہ دھند کے باعث وقت کے پہلے ختم کردیا گیا۔
 پاکستان کی جانب سے اننگز کا آغاز شان مسعود اور محمد ہریرہ نے کیا جو کہ ٹیم کو ایک اچھا آغاز فراہم کرنے میں ناکام رہے اورقومی ٹیم کی پہلی وکٹ 16 رنز پر گری، بیٹر محمد ہریرہ 6 بناکر پویلین لوٹ گئے جبکہ 20 کے مجموعی اسکور پر کپتان شان مسعود صرف 11 رنز بناکر میدان چھوڑ گئے۔
پاکستان کی تیسری وکٹ 31 رنز پر گری جب کامران غلام 5 رنز بنا کر پویلین لوٹ گئے،جبکہ 46 کے  مجموعی اسکور پر بابر اعظم 8 رنز بنا کر کیچ آؤٹ ہو گئے۔
اس کے بعد محمد رضوان اور سعود شکیل نے ذمہ دارانہ بیٹنگ کا مظاہرہ کرتے ہوئے ٹیم کے سکور کا آگے بڑھایا، محمد رضوان 51 جبکہ سعود شکیل 56 رنز کیساتھ کریز پر موجود ہیں۔
قبل ازیں قومی ٹیم کے کپتان شان مسعود نے ٹاس کے موقع پر گفتگو کرتے ہوئے کہا ہے کہ پہلی اننگز میں بڑا ٹوٹل کھڑا کر کے حریف ٹیم کو پریشانی میں ڈالنا چاہتے ہیں، ورلڈ ٹیسٹ چیمپئن شپ کی آخری سیریز میں فتح سمیٹ کر سیزن کا اختتام کرنا پہلا ہدف ہے۔
اس موقع پر ویسٹ انڈیز کے کپتان کریگ براتھویٹ نے کہا کہ ٹاس جیت کر پہلے بیٹنگ کا ہی فیصلہ کرتے تاہم کوشش ہوگی ابتداء میں میزبان ٹیم کیخلاف جلد وکٹیں لیکر انہیں مشکل میں ڈالیں۔