پالیسیوں کی خلاف ورزی کرنے پر پاکستان میں 6.5 ملین ویڈیوز ہٹائی گئیں

تفصیلات کے مطابق ترجمان ٹک ٹاک کا کہنا ہے کہ  گائیڈ لائنز کی خلاف ورزی اور غیر مناسب مواد ہٹانے کے حوالے سے پاکستان دوسری بڑی مارکیٹ ہے، عالمی سطح پر پہلی سہ ماہی  کے دوران 61 ملین سے زائد ویڈیوز  ہٹائی گئیں،یہ تعداد ٹک ٹاک پر اپ لوڈ کی گئیں تمام ویڈیوز کے 1 فیصد سے بھی کم ہے۔91.3 فیصد ویڈیوز کو رپورٹ ہونے اور 81.8 فیصد ویڈیوز کو دیکھنے سے قبل ہٹایا گیا۔

ترجمان ٹک ٹاک کا کہنا ہے کہ ٹک ٹاک کمیونٹی کو محفوظ رکھنے کیلئے عوامی صحت کے ماہرین کے ساتھ بھی کام کر رہا ہے،اس پلیٹ فارم کے ذریعے کووڈ-19 اور ویکسین کے بارے میں معلومات بھی فراہم کی گئیں ہیں ،پہلی سہ ماہی کے دوران، کووِڈ-19 انفارمیشن ہب کو  دنیا بھر میں 1.5 بلین سے زائد بار دیکھا گیا،ٹک ٹاک پر کووِڈ19-سے متعلق رہنمائی کیلئے پبلک سروس اعلانات اور ویکسین کے ہیش ٹیگ شامل کئے گئے۔

ترجمان ٹک ٹاک کے مطابق  اسی عرصے میں، کورونا سے متعلق گمراہ کن معلومات پھیلانے والی 30 ہزار سے زائد ویڈیوز بھی ہٹائی گئیں۔غیر مناسب مواد کو خود بخود ہٹانے کیلئے ٹیکنالوجی پر بھی بھروسہ کیا جاتا ہے۔ ٹک ٹاک اپنی ماڈریشن ٹیم کی تعلیم و تربیت پر مسلسل کام کررہا ہے۔