انسٹا گرام میں اب 3 منٹ طویل ریلز ویڈیوز اپ لوڈ کرنا ہوا ممکن

انسٹا گرام میں اب آپ 3 منٹ طویل ریلز ویڈیوز اپ لوڈ کرسکتے ہیں۔

اب تک انسٹا گرام ریلز میں 90 سیکنڈ طویل ویڈیوز پوسٹ کرنا ممکن تھا مگر اب اس دورانیے کو دوگنا بڑھایا جا رہا ہے۔انسٹا گرام کے سربراہ ایڈم موسیری نے یہ اعلان کیا۔

انہوں نے بتایا کہ صارفین کی جانب سے شکایت کی جاتی تھی کہ 90 سیکنڈز کا وقت بہت کم ہوتا ہے۔ دلچسپ بات یہ ہے کہ جولائی 2024 میں ایڈم موسیری نے کہا تھا کہ انسٹا گرام میں طویل ویڈیوز کے فیچر پر توجہ مرکوز نہیں کی جائے گی کیونکہ ایسا کرنے سے پلیٹ فارم کا لوگوں کو دوستوں سے ملانے کا اصول متاثر ہوگا۔

انسٹا گرام کی جانب سے زیادہ طویل ویڈیوز کا فیچر اس وقت متعارف کرایا گیا ہے جب امریکا میں ٹک ٹاک پر پابندی کا اطلاق ہوگیا ہے۔ٹک ٹاک صارفین کو 2021 سے 3 منٹ طویل ویڈیوز پوسٹ کرنے کا آپشن دستیاب تھا۔

انسٹا گرام کی جانب سے ریلز کے دورانیے میں بہت سست روی سے اضافہ کیا جا رہا ہے۔2 سال قبل میٹا کی زیر ملکیت فوٹو شیئرنگ ایپ میں ریلز کا دورانیہ 90 سیکنڈ کرنے کا اعلان کیا گیا تھا۔

ایک موقع پر کمپنی کی جانب سے 10 منٹ طویل ریلز پوسٹ کرنے کے فیچر کی آزمائش بھی شروع کی گئی تھی مگر پھر اس پر کام روک دیا گیا۔