دوہرے قتل کے مجرم ظفر اقبال کی سزائے موت کے خلاف اپیل مسترد

لاہور ہائیکورٹ نے دوہرے قتل کے مجرم ظفر اقبال کی سزائے موت کے خلاف اپیل مسترد کر دی۔ عدالت نے مجرم کی پھانسی کی سزا برقرار رکھی۔

دوہرے قتل کے مجرم ظفر اقبال کی جانب سے لاہور ہائیکورٹ میں سزائے موت کے خلاف اپیل دائر کی گئی۔ جسٹس شہرام سرور کی سربراہی میں دو رکنی بنچ نے سماعت کی۔

مجرم کے وکیل نے مؤقف اختیار کیا کہ مجرم کے خلاف پیش کے گیے میڈیکل کی تاریخ درست نہیں ہے، مجرم کے خلاف سزا معطل کی جائے۔ جبکہ سرکاری وکیل نے مؤقف دیا کہ مجرم نے کلہاڑی کے وار کر کے اپنی بیوی اور سوتیلی بیٹی کو قتل کیا، مجرم نے اپنے سوتیلے بیٹے علی رضا اور بیٹی امیر فاطمہ کو شدید زخمی کیا۔

سرکاری وکیل کے مطابق مجرم کو ایڈیشنل سیشن جج نے 2021 کو دو مرتبہ پھانسی کی سزا سنائی، مجرم نے 18 اکتوبر 2018 کو پھلروان سرگودھا میں جرم کا ارتکاب کیا، مجرم کے سفاکانہ جرم کے بعد یہ کسی رعایت کا مستحق نہیں ہے، عدالت سزا کے خلاف اپیل خارج کرے۔

عدالت نے مجرم کی پھانسی کی سزا کے خلاف اپیل مسترد کر دی۔