پنجاب اسمبلی میں پتنگ بازی پر پابندی کا بل منظور،خلاف ورزی پر سزائیں ہوں گی

لاہور: پنجاب اسمبلی نے صوبے میں پتنگ بازی پر مکمل پابندی عائد کرنے کا بل منظور کر لیا،جس کے تحت خلاف ورزی پر سخت سزائیں ہوں گی۔
صوبائی محکمہ داخلہ کے مطابق پنجاب میں پتنگ بازی کی ممانعت کا ترمیمی ایکٹ 2024 منظور کر لیا گیا ہے،اس ایکٹ کے تحت صوبہ بھر میں پتنگ بازی کو ناقابل ضمانت جرم قرار دیا گیا ہے، جبکہ اس کی خلاف ورزی پر کم از کم 3 سے 7 سال تک قید کی سزا ہوگی ۔
منظور ہونے والے ترمیمی ایکٹ 2024 کے مطابق پتنگ بازی، تیاری، فروخت و نقل و حمل پر مکمل پابندی ہو گی، جبکہ پتنگ ساز اور ٹرانسپورٹرز کو 5 لاکھ سے 50 لاکھ تک جرمانہ ہوگا۔
بل کے تحت پابندی کا اطلاق پتنگوں، دھاتی تاروں، نائلون کی ڈوری، تندی اور پتنگ بازی کے مقصد کے لیے تیز دھار مانجھے کے ساتھ تمام دھاگوں پر ہوگا،بل کے تحت پتنگ اڑانے والے کو 3 سے 5 سال قید یا 20 لاکھ روپے جرمانہ یا دونوں ہوں گے،۔
محکمہ داخلہ کا کہنا ہے کہ پتنگ بازی میں ملوث بچے کو پہلی بار 50 ہزارروپے جرمانہ ہوگاجبکہ دوسری بار ایک لاکھ روپے کا جرمانہ ہوگا۔
واضح رہے کہ پتنگ بازی کے دوران تیز دھار ڈور کے استعمال سے کئی قیمتی جانوں کا ضیاع ہوا، انسانی جانوں کے تحفظ کیلئے پتنگ بازی پر مکمل پابندی کا قانون منظور کروایا گیا ہے۔