وزیر قانون خیبرپختونخوا سلطان محمدخان مستعفی

سماجی رابطے کی ویب سائٹ ٹوئٹر پر وزیراعلیٰ خیبرپختونخوا محمود خان نے وزیر قانون خیبرپختونخوا سلطان محمدخان کے استعفیٰ کی تصدیق کی۔اپنے بیان میں وزیراعلیٰ خیبرپختونخوا محمود خان کا کہنا تھا کہ وزیر قانون کا استعفی موصول ہو گیا ہے۔

Resignation received from the Law Minister Sultan Mohammad Khan. pic.twitter.com/upU5o7qcS5

— Mahmood Khan (@IMMahmoodKhan) February 9, 2021

خیال رہے کہ 2018 سینیٹ انتخابات میں ہارس ٹریڈنگ کی ویڈیو سامنے آنے پر وزیر اعلی نے سلطان محمد سے استعفی طلب کیا تھا۔

2018 کے سینیٹ انتخابات میں ووٹوں کی خریدوفروخت کی مبینہ ویڈیو منظرعام پرآئی ہے۔ ویڈیو میں اراکین اسمبلی کو پیسے گنتے اور بیگ میں ڈالتے دیکھا جاسکتا ہے۔2018کی اس وڈیو میں موجودہ وزیرقانون خیبرپختونخوا سلطان محمد خان بھی موجود ہیں جبکہ ویڈیو میں پیپلزپارٹی کے سابق ایم  پی اے محمد علی  باچا رقم پی ٹی آئی ارکان کو دیتےنظرآرہے ہیں، وڈیو میں سلطان محمد خان رقم وصول کرکے بیگ میں رکھ لیتے ہیں، پی ٹی آئی کے سردار ادریس بھی وڈیو میں موجود ہیں اور  رقم وصول کرتےنظر آرہے ہیں۔

واضح رہے کہ  2018 میں پاکستان تحریک انصاف  ( پی ٹی آئی) نے ووٹ فروخت کرنے پر20ارکان اسمبلی کو پارٹی سے نکالا تھا۔

دوسری جانب وزیراعظم عمران خان سینیٹ انتخابات 2021اوپن بیلٹنگ سے کرانا چاہتے ہیں ۔حکومت  اوپن بیلٹ کیلئے  سپریم کورٹ میں صدارتی ریفرنس بھی دائر کر چکی ہے اور  اوپن بیلٹنگ کے لئے ایک آرڈیننس بھی جاری کرچکے ہیں جو سپریم کورٹ آف پاکستان کے فیصلے سے مشروط ہے۔ جبکہ اپوزیشن جماعتیں جن میں پاکستان   مسلم لیگ(ن)،پیپلزپارٹی اور جے یوآئی(ف) ہیں ، ان جماعتوں  نے سپریم کورٹ میں اوپن بیلٹ صدارتی ریفرنس کیس میں جواب جمع کراتے ہوئے اوپن بیلٹ کی مخالفت کردی  ہوئی ہے۔