بیلا روس کےالیگزینڈرلو کاشینکو مسلسل ساتویں بار صدر منتخب

منسک :بیلا روس کے الیگزینڈرلو کاشینکو مسلسل ساتویں بار بھاری اکثریت سے  صدر منتخب ہو گئے ہیں۔
بیلا روس کے سرکاری میڈیا کی جانب سے جاری کردہ ایگزٹ پولز کے مطابق، چار دیگر امیدواروں کے مقابلے میں لوکاشینکو نے 87.6 فیصد ووٹ حاصل کیے، جبکہ دیگر امیدواروں میں سے کوئی بھی 5 فیصد سے زیادہ ووٹ حاصل نہیں کر سکا۔
صدارتی حلف اٹھانے کے بعد لوکاشینکو 2030 تک اقتدار میں رہیں گے۔ بیلاروس کے پہلے اور آزادی کے بعد کے واحد رہنما، لوکاشینکو نے 1994 سے ملک کی قیادت کی ہے، جو مسلسل چھ مرتبہ عہدے پر فائز ہیں۔
وزیراعظم محمد شہباز شریف نے بیلا روس کے صدر الیگزینڈر لوکا شینکو کو صدارتی انتخاب میں کامیابی پر مبارکباد دیتے ہوئے کہا ہے کہ پاکستان اور بیلاروس کے مضبوط تعلقات کے لئے مشترکہ وژن کو عملی جامہ پہنانے کے لیے مل کر کام کرتے رہیں گے۔
واضح رہے کہ لوکاشینکو کو 2020 میں آخری بار منتخب ہونے کے بعد بین الاقوامی تنقید کے طوفان کا سامنا کرنا پڑا، مغربی ممالک نے ملک کے طویل مدتی رہنما پر انتخابی دھاندلی کا الزام لگایا، جس کی انہوں نے تردید کی۔
انتخابات کے بعدملک میں بڑے پیمانے پر مظاہرے پھوٹ پڑے تھے، اور مغرب کی حامی حزب اختلاف کی رہنما سویتلانا تیخانوسکایا اس بات پر اصرار کرتی رہیں کہ وہ فاتح ہیں، اور مغربی حکومتوں کے ساتھ بات چیت کرتے ہوئے خود کو بیلاروس کی “منتخب صدر” بتاتی ہیں۔