وزیر اعلیٰ پنجاب اور چین کے بی جی آئی گروپ کے چیئرمین کے درمیان ملاقات

وزیراعلیٰ پنجاب مریم نواز سے چین کے معروف بی جی آئی گروپ کے چیئرمین وانگ جیان کی ملاقات ہوئی، جس میں کینسر کے علاج اور جدید جینیاتی تحقیق کے حوالے سے اہم پیشرفت پر بات چیت کی گئی۔

وزیراعلیٰ مریم نواز نے کہا کہ بی جی آئی گروپ کی جانب سے کینسر کے علاج، جینیاتی ٹیسٹنگ اور جدید تحقیق کے لیے فراہم کی جانے والی مدد پنجاب کے عوام کے لیے ایک بڑی کامیابی ہوگی۔
ملاقات میں دونوں فریقین نے پنجاب میں جینیاتی سائنس کے شعبے میں پبلک پرائیویٹ پارٹنرشپ کے فروغ اور بائیولوجیکل جین بینک کے مرکز کی بنیاد رکھنے کا جائزہ لیا۔

ملاقات میں اس بات پر بھی اتفاق کیا گیا کہ نوازشریف کینسر اسپتال میں جین سیکوینسنگ یونٹ قائم کیا جائے گا۔ علاوہ ازیں، بی جی آئی گروپ نے بہاولپور کے صحرائی علاقے میں چاول اور مکئی کی کاشت کے لیے پائلٹ پروجیکٹ کی پیشکش بھی کی، جس سے زراعت کے شعبے میں جدیدیت لانے کی امید ہے۔

انہوں نے اس بات پر زور دیا کہ اس اشتراک سے پنجاب میں جینیاتی ٹیکنالوجی کے استعمال کے لیے جدید ترین لیبارٹریز قائم کی جائیں گی، جس سے نہ صرف کینسر کی تشخیص اور علاج میں بہتری آئے گی بلکہ دنیا بھر میں پنجاب کا نام سائنسی تحقیق میں نمایاں ہوگا۔