گوگل میپس کا نیا فیچرجو صارفین کو ضرور پسند آئے گا

گوگل میپس میں ایک ایسا نیا فیچر متعارف کرایا جا رہا ہے جو آپ کو ضرور پسند آئے گا۔

گوگل میپس کا یہ فیچر ان صارفین کے لیے مددگار ثابت ہوگا جو گاڑیوں کے مالک ہیں۔ 9 ٹو 5 گوگل کی ایک رپورٹ کے مطابق گوگل میپس میں نیوی گیشن کے دوران صارفین کو اپنی گاڑی کے آئیکون کو کسٹمائز کرنے کی سہولت فراہم کی جا رہی ہے۔

4 سال قبل گوگل کی جانب سے نیوی گیشن اسکرین میں میپس صارفین کو ان کی گاڑیوں کا روپ بدلنے کی سہولت فراہم کی گئی تھی۔ اب تک گوگل میپس میں گاڑیوں کے 4 آئیکونز دستیاب تھے، جن میں ایک ریگولر ایرو کا آئیکون تھا، دوسرا زرد ایس یو وی، تیسرا سرخ گاڑی اور چوتھا سبز پک اپ ٹرک کا آپشن تھا۔

مگر اب اینڈرائیڈ ڈیوائسز کے لیے گوگل میپس میں گاڑیوں کے آئیکونز کو کسٹمائز کرنے کی سہولت فراہم کی جا رہی ہے۔ یہ فیچر ابھی محدود صارفین کو دستیاب ہے اور اس کے ذریعے وہ گاڑی کے آئیکون اسٹائل اور رنگ کو کسٹمائز کرسکتے ہیں۔

اسی طرح آپ کسٹمائز آئیکون پر کلک کرکے ٹرپ آپشنز کا انتخاب کرسکتے ہیں، اس آپشن میں آپ کو 5 گاڑیاں نظر آئیں گی جن میں لگژری سیڈان، آف روڈ پک اپ، ایس یو وی، اسپورٹس کار اور ہیچ بیک شامل ہیں۔ آپ 8 مختلف رنگوں میں سے کسی ایک کا انتخاب کرسکیں گے۔

جیسا اوپر درج کیا جاچکا ہے کہ یہ فیچر ابھی محدود صارفین کو دستیاب ہے تو ابھی یہ کہنا مشکل ہے کہ اسے کب تک تمام صارفین کے لیے متعارف کرایا جائے گا۔