پاکستان کے پہلے سکھ گلوکار جسی سنگھ لیل پوریا  ٹریفک حادثے میں شدید زخمی،حکومت سے مالی امداد کی اپیل کر دی

لاہور:پاکستان کے پہلے سکھ گلوکار جسی سنگھ لیل پوریا ٹریفک حادثے میں شدید زخمی ہو گئے، گلوکار نے علاج پر خطیر رقم خرچ ہونے کے بعد حکومت سے مالی امداد کا مطالبہ کر دیا۔
،تفصیلات کے مطابق پاکستان کے پہلے سکھ گلوکار جسی سنگھ لیل پوریا جو اپنے منفرد انداز سے ملک و بیرون ملک خاصی شہرت رکھتے ہیں ، چند روز قبل لاہور کے علاقے والٹن میں ایک ٹریفک حادثے کا شکار ہو گئے، گلوکار جسی سنگھ اس ٹریفک حادثے میں بری طرح زخمی ہوئے۔  ان کے ہاتھ ، کمر اور دیگر حصوں پر گہری چوٹیں آئیں، علاج معالجے پر بڑھتے ہوئے اخراجات نے انہیں خاصہ متاثر کیا، مالی حالات مخدوش ہونے کے بعد گلوکار جسی سنگھ نے وزیر اعلی پنجاب اور دیگر سے مالی امداد کا مطالبہ کیا۔
گلوکار  جسی سنگھ نے جی این این نیوز سے خصوصی گفتگو کرتے ہوئے کہا کہ میں نے اپنے پیارے وطن پاکستان کیلئے بے شمار گیت گائے ہیں کیونکہ مجھے اس دھرتی سے بے حد لگاو ہے ، یہ میرا پیارا وطن ہے، اسکے علاوہ میں نے کئی سماجی منصوبے بھی مکمل کیے، اب مجھے امداد کی ضرورت ہے۔
دوسری جانب بین الاقوامی شہرت یافتہ فیشن ڈیزائنر اور معروف سماجی کارکن بی جی نے کہا ہے کہ ہم فنکار برادری کے ساتھ کھڑے ہیں۔ ان کا مزید کہنا تھا کہ وزیر اطلاعات پنجاب عظمیٰ بخاری کو جسی سنگھ سے متعلق درخواست بھی بھجوا دی ہے، امید ہے حکومت کی جانب سے  گلوکار جسی سنگھ کی داد رسی کی جائے گی۔