معروف شاعر اور ڈرامہ نویس امجد اسلام امجدکی دوسری برسی آج منائی جار ہی ہے

لاہور: پاکستان کے معروف شاعراور ڈرامہ نویس کو دنیا سے رخصت ہوئے دو برس بیت گئے۔
امجد اسلام امجد 4 اگست 1944 کو لاہور میں پیدا ہوئے،پنجاب یونیورسٹی سے ایم اے(اردو) پاس کیا اور درس وتدریس سے منسلک ہوگئے کچھ عرصہ نیشنل سینٹر سے وابستہ رہے چلڈرن لائبریری کمپیلکس لاہور کے پروجیکٹ ڈائرکٹر کے عہدے پر بھی فائز رہے۔
امجد اسلام امجد نے اپنے تخلیقی ذہن، شاعری کی نزاکت، نثر کی چاشنی اور ڈرامے کی جادوگری کو یکجا کر کے ایسا جہان تخلیق کیا جس کی بازگشت صدیوں تک سنائی دے گی۔
 امجد اسلام کو شاعری کے علاوہ تنقید اور ڈرامے سے لگاؤ ہے آپ کے کئی ٹی وی ڈرامے پبلک سے خراج تحسین حاصل کرچکے ہیں،ان کے لکھے ہوئے ڈرامے وارث، دہلیز، فشار، سمندر اور رات دن یہ صرف کہانیاں نہیں یہ حقیقت کے وہ آئینے ہیں جن میں معاشرے کی دھڑکنیں سنائی دیتی ہیں۔
امجد اسلام امجد وہ شاعر تھے جن کی غزلوں میں جذبات کی لطافت بھی تھی اور نظموں میں جدید حسیت کا عکس بھی نمایاں تھا۔
امجد اسلام امجد کی ادبی خدمات کے اعتراف میں انہیں صدارتی تمغہ حسن کارکردگی، ستارہ امتیاز، نگار ایوارڈ اور بے شمار ملکی و غیر ملکی اعزازات سے نوازا گیا،اس کے علاوہ امجد اسلام پانچ مرتبہ ٹیلی وژن کے بہترین رائٹر، سولہ مرتبہ گریجویٹ ایوارڈ اور دیگر متعدد ایوارڈ حاصل کرچکے ہیں۔
امجد اسلام امجدؔ بیس سے زیادہ کتابوں کے مصنف بھی ہیں، ان کی مشہور کتابوں میں ’’برزخ‘، ’عکس‘، ’ساتواں در‘  ’فشار‘، ’ذرا پھر سے کہنا‘ (شعری مجموعے) ’وارث‘، ’دہلیز‘ (ڈرامے) ’ آنکھوں میں تیرے سپنے‘ (گیت)’شہر در شہر‘ (سفرنامہ) ’پھریوں ہوا‘  ’یہیں کہیں" بارش کی آواز، شام سرائے، اتنے خواب کہاں رکھوں، نزدیک، یہیں کہیں،سحر آثار، ساحلوں کی ہوا،محبت ایسا دریا ہے، برزخ اس پار وغیرہ شامل ہیں ۔
اردو ادب اور پاکستان کا نامورستارہ 10فروری 2023 کو یہ درویش صفت شاعر اور خوابوں کا سوداگر ہمیشہ کے لیے امر ہو گیا مگر ان کے الفاظ اور خیالات آج بھی لاکھوں پرستاروں کے دلوں میں زندہ ہیں۔