امیگریشن حکام کی کارروائی ِ، عمرہ ویزوں کے ذریعے 4 خواتین کی سعودی عرب اسمگلنگ کی کوشش ناکام

کراچی:وفاقی تحقیقاتی ادارے (ایف آئی اے) کے امیگریشن سرکل نے کراچی کے جناح انٹرنیشنل ایئر پورٹ پر کارروائی کرتے ہوئےعمرے کی آڑ میں 4 خواتین کی سعودی عرب اسمگلنگ کی کوشش ناکام بناتے ہوئے انہیں حراست میں لے لیا۔
ایف آئی اے امیگریشن کی جانب سے کی گئی ابتدائی تفتیش کے بعد معلوم ہوا کہ بظاہر متاثرہ خواتین عمرہ ویزوں پر سعودی عرب جارہی تھیں، تاہم ان خواتین کو جبری مشقت کی غرض سے سعودی عرب بھجوایا جا رہا تھا۔
ایف آئی اے حکام کا کہنا ہے کہ گرفتار کی گئی خواتین شازیہ بانو، ظمیراعظیم، لبنیٰ اور ثنا شہزادی عمرے کی ایک پرواز کی مسافر تھیں، متاثرہ خواتین اس سے قبل بھی سعودی عرب جا چکی تھیں، ان کو سعودی عرب بھجوانے میں آسیہ نامی خاتون ملوث ہے۔
ایف آئی اےذرائع کے مطابق آسیہ نامی ملزمہ پنجاپ پولیس کی سابقہ ملازم ہے، آسیہ نے ہی متاثرہ چاروں خواتین کے سفری اخراجات برداشت کیے۔
جبکہ ان کے سعودی عرب میں قیام اور اخراجات کی سہولت کاری وسیم گجر نامی ایجنٹ کر رہا تھا، متاثرہ خواتین سے ایجنٹوں کے حوالے سے معلومات لی جا رہی ہیں۔