لاہور،گوجرانوالہ، اسلام آباد سمیت پنجاب کے مختلف شہروں میں بارش، موسم خوشگوار

صوابی میں موسم سرما کی پہلی بارش کا سلسلہ جاری ہے، جس نے علاقے کی زرعی زمینوں میں نمی کی کمی کو پورا کیا ہے۔

بھکر میں بارش کی وجہ سے سردی میں اضافہ ہو گیا ہے اور خشک سالی سے متاثرہ علاقوں میں امید کی نئی کرن پیدا کی ہے۔ زرعی ماہرین کا کہنا ہے کہ تھل کی بارانی فصل چنا پر اس بارش کا مثبت اثر پڑے گا۔

سرائے مغل اور ہلہ شیخم ہنجرائے کلاں سمیت مختلف علاقوں میں بھی گرج چمک کے ساتھ بارش ہو رہی ہے۔ بارش کے دوران فیڈر ٹرپ کر گئے ہیں جس سے بجلی کی فراہمی متاثر ہوئی ہے۔

تاہم، زرعی ماہرین کے مطابق یہ بارش گندم کی فصل کے لیے مفید ثابت ہوگی اور نزلہ زکام جیسے موسمی بیماریوں میں کمی آئے گی۔

پنڈدادنخان اور گردونواح میں موسلادھار بارش نے موسم کی شدت کو کم کیا، جبکہ بورے والا میں بھی بارش سے ٹھنڈی ہوائیں چلنے لگیں اور سردی میں واضح کمی آئی۔ زرعی ماہرین کے مطابق بارش سے گندم کی فصل کو فائدہ پہنچے گا۔

بچیانہ میں رات گئے سے بارش کا سلسلہ وقفے وقفے سے جاری ہے، جس کے باعث بجلی کی فراہمی گزشتہ آٹھ گھنٹوں سے معطل ہے۔

رجانہ شہر اور مضافات میں بھی موسلادھار بارش ہوئی ہے، جس سے سردی میں اضافہ ہو گیا ہے۔ بارش کا یہ سلسلہ گندم کی فصل کے لیے فائدہ مند ثابت ہوگا۔ تاہم، بجلی کا نظام بارش کے باعث متاثر ہو گیا ہے۔