معروف امریکی اداکارہ اور"گوسپ گرل"39 سال کی عمر میں انتقال کر گئیں

مشہور امریکی اداکارہ مشیل ٹریچٹن برگ 39 سال کی عمر میں انتقال کر گئیں۔
امریکی اداکارہ مشیل ٹریچٹن برگ کو مشہور ڈراموں جیسے کہ بفی دی ویمپائر سلیئر اور گپ شپ گرل میں اپنی شاندار اداکاری کے لیے جانا جاتا تھا۔
پولیس کے مطابق بدھ کی صبح 8 بجے نیویارک سٹی میں واقع ان کے اپارٹمنٹ سے ہنگامی کال موصول ہوئی، جہاں وہ بے ہوش پائی گئیں۔
پولیس کا کہنا ہے کہ طبی عملے نے جائے وقوعہ پر اس کی موت کی تصدیق کی ہے اور ابتدائی تحقیقات میں کسی مجرمانہ سرگرمی کا شبہ نہیں ہے۔
میڈیا رپورٹس کے مطابق مشیل کا حال ہی میں جگر کا ٹرانسپلانٹ ہوا تھا اور ممکن ہے کہ ان کی موت قدرتی وجوہات سے ہوئی ہو تاہم موت کی حتمی وجہ جاننے کے لیے طبی معائنہ جاری ہے۔
اداکارہ کی اچانک موت پر ساتھی فنکاروں اور دوستوں نے گہرے دکھ کا اظہار کیا ہے، گوسپ گرل میں ان کے ساتھی اداکار ایڈ ویسٹ وِک نے انسٹاگرام پر اپنے جذبات کا اظہار کرتے ہوئے کہا ہے کہ بہت افسوس ناک خبر ہے۔
واضح رہے کہ مشیل ٹریچٹن برگ نے اپنے کیریئر کا آغاز 3 سال کی عمر میں کیا تھا اور دی ایڈونچرز آف پیٹ اینڈ پیٹ اور آل مائی چلڈرن جیسے شوز میں کام کیا تھا۔
 1996ء میں انہوں نے ہیریئٹ دی اسپائی میں مرکزی کردار ادا کیا تھا، 2000ء سے 2003ء تک وہ بفی دی ویمپائر سلیئر میں ڈان سمرز کے کردار  میں نظر آئیں، گوسپ گرل میں انہوں نے جارجینا اسپرکس کا کردار نبھایا تھا۔