پنجاب کے مختلف علاقوں میں وقفے وقفے سے بارش کا سلسلہ جاری

صوبائی دارلحکومت سمیت پنجاب کے مختلف علاقوں میں وقفے وقفے سے بارش کا سلسلہ جاری ہے، بارش کے باعث جارتی سردی کو بریک لگ گئی، موسم خوشگوار ہوگیا۔  

 تفصیلات کے مطابق لاہور، شیخوپورہ، ساہیوال، پاکپتن، اوکاڑہ، پھالیہ،جلالپور بھٹیاں،  منڈی بہاؤالدین میں وقفے وقفے سے بارش کا سلسلہ جاری ہے ، بارش کے باعث سردی کی شدت میں اضافہ ہوگیا ، سرد ہوائیں بھی چلنے لگیں ۔

وزیر اعلیٰ پنجاب مریم نواز شریف کی خصوصی ہدایات پر واسا لاہور مکمل الرٹ  ہوگئی ، وائس چیئرمین واسا چودھری شہباز احمد اور ایم ڈی واسا غفران احمد نے تمام مرکزی شاہراہوں اور انڈر پاسز کو کلیئر رکھنے کی ہدایات کر دیں ،تمام فیلڈ ٹیموں کو متحرک رہنے کی ہدایات  بھی جاری  کردی گئی۔  

ایم ڈی واسا غفران احمد کا کہنا ہے کہ بارشی پانی کے بروقت نکاس کو ممکن بنایا جا  ئے گا، تمام ڈسپوزل اسٹیشنز کے پمپس کو آپریشنل رکھا جائے اور سکرینوں کو صاف رکھا جائے، تمام جنریٹرز کو اسٹینڈ بائی پر رکھا جائے بجلی کی بندش کی صورت میں ڈسپوزل اسٹیشنز کو جنریٹرز پر چلایا جائے، تمام ٹاون ڈائریکٹرز اپنے ٹاؤنز کی مکمل مانیٹرنگ رکھیں ۔

بارش  کے باعث  کسانوں میں خوش کی لہر دوڑ گئی ،کسانوں کا کہنا ہے کہ حالیہ بارشیں گندم کی فصل کیلئے مفید ثابت ہو گی ،حالیہ بارش گندم کی پیدوار میں اضافے اور وبائی امراض میں کمی کا باعث بنے گی۔  

 دوسری جانب بارش کے باعث مختلف علاقوں کے فیڈر بھی ٹرپ  ہونے سے بجلی غائب ہوگئی ، جس کے باعث شہریوں کو مشکلات کا سامنا ہے، جبکہ بیشتر علاقوں میں پانی جمع ہوگیا ، جس کے بعد راہگیروں کو مشکلات کا سامنا کرنا پڑ رہا ہے۔