امریکا نے کینیڈا اور میکسیکو پر عائد ٹیرف کا نفاذ ایک ماہ کےلئے مؤخر کر دیا

امریکا نے کینیڈا اور میکسیکو کی مصنوعات پر ٹیرف کا نفاذ ایک مہینے کے لیے مؤخرکر دیا۔

غیر ملکی خبر رساں ایجنسی کے مطابق امریکی صدر ڈونلڈ ٹرمپ نے ٹیرف کا نفاذ 2 اپریل تک مؤخر کرنے کے ایگزیکٹو آرڈر پر دستخط کردیئے، ایگزیکٹو آرڈر میکسیکو کی صدر کے ساتھ گفتگو اور کینیڈین حکام سے انتظامیہ کی بات چیت کے بعد جاری کیے۔

امریکی صدر ٹرمپ نے میڈیا سے گفتگو کرتے ہوئے کہا کہ میکسیکو اور کینیڈا پر ٹیرف کو 2 اپریل تک مؤخر کیا ہے، 2 اپریل امریکی تاریخ کا اہم دن ہوگا۔ کینیڈا اور بھارت ہماری مصنوعات پر سب سے زیادہ ٹیکس لگاتے ہیں۔

ٹرمپ نے مزید کہا کہ حماس سے یرغمالیوں کی رہائی کیلئے بات کی ہے، حماس کو غزہ میں قید تمام یرغمالیوں کو رہا کرنا ہوگا۔غزہ کو اچھے طریقے سے چلایا جاسکتا ہے،ماضی میں کسی نے توجہ نہیں دی۔

اس کے علاوہ ٹرمپ کا کہنا تھا کہ یوکرین کی مدد کیلئےاربوں ڈالر دیے، چاہتا ہوں روس اور یوکرین کے درمیان جلد جنگ بندی معاہدہ ہوجائے۔چینی صدر کے ساتھ بہترین تعلقات ہیں، ٹک ٹاک میں دلچسپی ہے امید ہے چین کے ساتھ معاملات طے پاجائیں گے۔

امریکی صدر نے کہا کہ جوبائیڈن انتظامیہ کی غلط پالیسی سے افغانستان کو نقصان اٹھانا پڑا، سعودی عرب اور روس کے ساتھ تجارتی معاہدہ چاہتے ہیں، جو ممالک اپنی افواج پر مناسب اخراجات نہیں کررہے وہ دفاع کے مستحق نہیں۔

دوسری جانب کینیڈا کے وزیراعظم جسٹن ٹروڈو نے کہا کہ کینیڈ ا میں تمام انتقامی اقدامات اس وقت تک برقرار رہیں گے جب تک امریکا اپنے محصولات کو مکمل طور پر واپس نہیں لیتا۔

یاد رہے کہ امریکی صدر نے گزشتہ ماہ میکسیکو اورکینیڈا پر 25 اور چین پر 10 فیصد ٹیرف عائد کرنے کا اعلان کیا تھا جس کے بعد کینیڈا نے بھی امریکا پر جوابی 25 فیصد ٹیرف لگانے کا اعلان کیا تھا۔

امریکا کی جانب سے کینیڈا اور میکسیکو پر 25 فیصد ٹیرف 4 مارچ سے نافذ ہونا شروع ہوا تاہم اب اسے ایک ماہ کیلئے مؤخر کردیا گیا ہے۔