پاک افغان کشیدگی: طورخم بارڈر 28 دن بعد پیدل آمدورفت کے لیے کھل گیا

طورخم: پاکستان اور افغانستان کے درمیان سرحدی کشیدگی کے باعث طورخم بارڈر 28 روز بعد پیدل آمدورفت کیلئے کھول دیا گیا۔
امیگریشن حکام کا کہنا ہے کہ طورخم سرحدی گزرگاہ پرپیدل آمدورفت کا آغاز ہو گیا ہے، صرف پاسپورٹ ویزا کے حامل مسافروں کو افغانستان آنے جانے کی اجازت ہے۔
آج عام شہریوں کی پیدل آمدورفت کا آغاز کر دیا گیا، طورخم کے راستے روزانہ 10 ہزار مسافر سفر کرتے ہیں، ہر روز 1500 تجارتی گاڑیاں طورخم بارڈر سے گزرتی ہیں۔
اس سے قبل 21 فروری کو پاکستان اور افغانستان کے درمیان کشیدگی کے باعث سرحدی گزرگاہ کو ہرقسم کی آمدورفت کے لیے بند کر دیا گیا تھا۔
خیال رہے کہ تین روز قبل سرحدی گزرگاہ کو تجارت کے لئے کھول دیا گیا تھا، پاک افغان فورسز کی کشیدگی کے دوران امیگریشن سسٹم کو فائرنگ کی وجہ سے نقصان پہنچا تھا، امیگریشن سسٹم میں فنی خرابی کی وجہ سے پیدل آمد و رفت معطل رہی۔
پاکستانی اور افغان فورسز کی جھڑپوں سے صورتحال کشیدہ رہی،  2024 میں پاک افغان تجارتی حجم 1.6 بلین ڈالر سے تجاوز کر گیا، طورخم بارڈر خطے میں تجارت اور نقل و حرکت کا اہم راستہ ہے۔