وزیر اعظم سعودی عرب کا سرکاری دورہ مکمل کرکے جدہ سے اسلام آباد کے لیے روانہ

 وزیراعظم محمد شہباز شریف سعودی عرب کا سرکاری دورہ مکمل کرکے جدہ سے اسلام آباد کے لیے روانہ ہوگئے جب کہ گورنر جدہ عزت مآب شہزادہ سعود بن عبداللہ بن جلاوی نے وزیراعظم کو ایئرپورٹ پر رخصت کیا۔

وزیراعظم شہباز شریف نے 19 سے 22 مارچ 2025 تک سعودی عرب کا دورہ کیا ، اس دوران وزیراعظم کی سعودی ولی عہد و وزیراعظم محمد بن سلمان سے ملاقات ہوئی جس میں دونوں رہنماؤں نے تجارت، شراکت داری اور اقتصادی تعاون کو بڑھانے کے طریقوں پر تبادلہ خیال کیا۔

وزیراعظم نے سعودی وزیر سرمایہ کاری خالد الفالح اور اقتصادی امور کے لیے تشکیل کردہ ٹاسک فورس کے سربراہ محمد التجویری سے بھی ملاقات کی۔ ان ملاقاتوں میں پاکستان میں سعودی سرمایہ کاری کے فروغ پر گفتگو ہوئی۔

دورے کا مقصد پاکستان اور سعودی عرب کے درمیان دوطرفہ تعلقات کو مزید مستحکم کرنا، اقتصادی تعاون بڑھانا اور سرمایہ کاری کے مواقع کو فروغ دینا تھا ، وزیراعظم نے دورے کے اختتام پر مدینہ منورہ میں روضہ رسول ﷺ پر حاضری دی اور مکہ مکرمہ میں وفد کے ہمراہ عمرہ ادا کیا۔