ارتھ آور اور ورلڈ واٹر ڈے 2025ء کے موقع پر ایک منٹ کیلئے تمام لائٹس بند کر دی جائیں گیں

صدر آصف علی زرداری اور وزیر اعظم محمد شہباز شریف نے کہا ہے کہ ہم توانائی کے تحفظ، ماحولیاتی استحکام اور موسمیاتی لائحہ عمل کے حوالے سے اپنے عزم کا اعادہ کرتے ہوئے عالمی برادری کے ساتھ کھڑے ہیں۔

آج (ہفتہ) ارتھ آور اور ورلڈ واٹر ڈے 2025ء کے موقع پر اپنے پیغام میں صدر نے کہا کہ جب ہم غیر ضروری لائٹس بند کرتے ہیں تو اس سے توانائی کی کھپت اور کاربن کے اخراج میں کمی سمیت پاکستان کے ماحولیاتی نظام کی حفاظت کو فروغ ملتا ہے۔انہوں نے کہا کہ ہمیں موسمیاتی تبدیلی کے مضر اثرات سے نمٹنے، آبی آلودگی کی روک تھام اور پائیدار زرعی طریقوں کے استعمال کو فروغ دینا چاہیے۔انہوں نے تمام پاکستانیوں پر زور دیا کہ وہ بجلی، ایندھن اور پانی کو محفوظ بنانے کیلئے پائیدار عادات اپنائیں اور ایک سرسبز اور خوشحال پاکستان کی تعمیر میں اپنا کردار ادا کریں۔

اس موقع پر اپنے پیغام میں وزیر اعظم شہباز شریف نے کہا کہ حکومت ایسی پالیسیوں پر عمل پیرا ہے جو تمام شعبوں میں پائیداری کو فروغ دینے کیلئے پالیسی اقدامات کے ساتھ ساتھ موسمیاتی عمل کو مربوط کرتی ہیں۔

انہوں نے کہا کہ قابل تجدید توانائی کے استعمال میں اضافے، پلاسٹک کے فضلے میں کمی اور ماحول دوست توانائی کے شعبے میں روزگار کے مواقع کے ذریعے ہم طویل مدت ماحولیاتی تحفظ کی بنیاد رکھ رہے ہیں۔انہوں نے کہا کہ اس سلسلے میں صرف حکومتی پالیسیاں ہی کافی نہیں ہیں بلکہ ہر شہری کو اپنی ذمہ داری ادا کرنا ہوگی۔

وزیر اعظم نے کہا کہ ہر عمل، چاہے وہ کتنا ہی چھوٹا ہو، ایک پائیدار مستقبل کے مشترکہ ہدف کے حصول میں معاون ثابت ہوتا ہے۔