پیمرا کی نو منتخب چئیر پرسن کونسل آف کمپلینٹس ڈاکٹر لبنیٰ ظہیر نے عہدے کا چارج سنبھال لیا

لاہور: پاکستان ایلکٹرونک میڈیا اینڈ ریگولیٹری اتھارٹی (پیمرا) کی نو منتخب چئیر پرسن کونسل آف کمپلینٹس ڈاکٹر لبنیٰ ظہیر نے عہدے کا چارج سنبھال لیا۔
 ڈاکٹر لبنی ظہیر نے دیگر اراکین کے ہمراہ پیمراکے علاقائی دفتر کا دورہ کیا اور پیمراکے افسران سے ملاقات کی۔ پیمراکے ڈائریکٹر جنرلز، ریجنل ڈائریکٹر اور دیگر افسران نے ڈاکٹر لبنیٰ ظہیر اور دیگر اراکین کا استقبال کیا،نئی کونسل کو پیمرااور کونسل آف کمپلینٹس کے قوانین و ضوابط کے حوالے سے تفصیلی بریفنگ دی گئی۔ 
اس موقع پر ڈاکٹر لبنیٰ ظہیر نے کہا کہ ہم بھرپور کوشش کریں گے کہ یہ کونسل عوام کی شکایات کے ازالے میں مؤثر کردار ادا کرے،انہوں نے کہا کہ وہ خود بھی ایک میڈیا پریکٹیشنر اور براڈکاسٹ جرنلسٹ رہی ہیں۔ "میں آزادی اظہار پر یقین رکھتی ہوں، لیکن میڈیا اخلاقیات کی بھی قائل ہوں۔انپوں نے مزید کہاکہ میں اپنا کردار اس انداز سے ادا کروں گی کہ آزادی اظہار متاثر نہ ہو،ڈاکٹر لبنیٰ ظہیر نے بتایا کہ وہ ماضی میں بھی چار سال تک اس کونسل کی رکن رہی ہیں، تاہم اب یہ کونسل زیادہ بااختیار ہو چکی ہے اور اس کی حدودِ کار میں اضافہ ہوا ہے، اسی لیے ان کی ذمہ داریاں بھی بڑھ گئی ہیں۔
انہوں نے مزید کہا کہ خاص طور پر اب میڈیا ورکرز کی تنخواہوں کی عدم ادائیگی یا تاخیر جیسے معاملات بھی کونسل کے دائرہ اختیار میں آ چکے ہیں، اور میڈیا کارکن اس حوالے سے اپنی شکایات کونسل کو بھیج سکتے ہیں، یہ ایک اہم اختیار ہے جو میڈیا ورکرز کے مسائل کے حل میں مدد دے گا۔