لیبیا میں تارکین وطن کی ایک اور کشتی ڈوب گئی، 11 افراد جاں بحق، 4 پاکستانی بھی شامل

مغربی افریقی ملک لیبیا میں تارکین وطن کی ایک اور کشتی ڈوب گئی جس کے نتیجے میں 11 افراد جاں بحق ہو گئے،جن کی لاشیں نکال لی گئیں جن میں سے چار کی پاکستانیوں کے طور پر شناخت کر لی گئی ہے۔
غیر ملکی میڈیا کے مطابق یہ واقعہ لیبیا کے مشرقی علاقے میں سیریت شہر کے قریب ہراوا کوسٹ میں 12 اپریل کو پیش آیا،حادثے کے مقام سے اب تک گیارہ لاشیں نکالی جاچکی ہیں جن میں سے چار پاکستانیوں کی ہیں۔
دوسری جانب واقعے کے بعدپاکستانی سفارتخانے کی ایک ٹیم نے سیریت شہر کا دورہ کر کے واقعہ کی معلومات حاصل کیں اور قومی دستاویزات سے چار لاشوں کی پاکستانیوں کے طور پر شناخت کر لی ہے۔
دستاویزات کے مطابق ان میں سے تین کا تعلق منڈی بہاؤالدین اور ایک کا گوجرانوالہ سے ہے۔
رپورٹ کے مطابق زاہد محمود ولد لیاقت علی کا تعلق گوجرانوالہ جبکہ سمیر علی ولد راجہ عبدالقدیر، سید علی حسین ولد شفقت الحسنین اور آصف علی ولد نذر محمد کا تعلق منڈی بہاؤالدین سے ہے،اس کے علاوہ دو لاشوں کی تاحال شناخت نہیں ہو سکی، جبکہ پانچ نعشیں مصری شہریوں کی ہیں۔
پاکستانی سفارتخانہ حادثے کے متعلق مزید معلومات کیلئے مقامی حکام سے رابطے میں ہے۔