نئی دہلی: رہائشی عمارت زمین بوس ہونے سے ایک ہی خاندان کے 11 افراد ہلاک،متعدد زخمی

نئی دہلی:بھارتی دارالحکومت نئی دہلی کے مضافات میں رہائشی عمارت گرنے کے نتیجے میں ایک ہی خاندان کے 11 افراد ہلاک جبکہ متعدد زخمی ہو گئے۔
بھارتی میڈیا رپورٹس کے مطابق دہلی کے شمال مشرق میں واقع مصطفی آباد کے علاقے دیال پور میں پیش آنے والے واقعے کے بعد امدادی کارروائیاں جاری ہیں جبکہ دہلی پولیس اور این ڈی آر ایف کی ٹیمیں ملبے سے لوگوں کو نکالنے کی کوشش کررہی ہیں۔
جائے وقوع پر موجود عینی شاہدین نے بتایا کہ چار منزلہ عمارت میں مالک مکان تحسین اپنے اہل خانہ کے ساتھ رہائش پذیر تھا، دو منزل پر وہ خود رہائش پذیر تھا جبکہ دیگر دو منزلوں پر کرایہ دار رہتے تھے۔
میڈیا رپورٹس میں مزید بتایا گیا کہ مرنے والوں میں تین بچے بھی شامل ہیں ،عمارت گرنے کی وجہ تاحال معلوم نہیں ہو سکی ہیں، پڑوسیوں نے بتایا کہ گرنے والی عمارت زیادہ پرانی نہیں تھی۔
دوسری جانب بھارتی وزیر اعظم نریندر مودی نے واقعے پر افسوس کا اظہار کرتے ہوئے کہا ہے کہ وہ جانوں کے ضیاع پر غمزدہ ہیں۔ ان کا کہنا تھا کہ زخمیوں کے جلد صحت یاب ہونے کی دعا کرتا ہوں۔