پی ایس ایل: ملتان میں کھیلے جانے والے میچز کا شیڈول تبدیل ،مگرکیوں؟

لاہور:پاکستان سپر لیگ (پی ایس ایل) سیزن 10 کے شیڈول میں تبدیلی پر غور کیا جارہا ہے، جس کے تحت دو میچز نئی تاریخوں پر کھیلے جائیں گے۔
اس حوالے سے دونوں میچز کی نئی تاریخ بھی سامنے آ گئی۔
یکم مئی کو شیڈول ملتان سلطانز اور کراچی کنگز کا میچ 6 مئی کو ہو گا،اسی طرح 10 مئی کو ہونے والا میچ، جس میں ملتان سلطانز اور کوئٹہ گلیڈی ایٹرز کا ٹاکرا ہونا تھا، اب 11 مئی کو ہوگا۔
ذرائع کا کہنا ہے کہ براڈ کاسٹرز کی درخواست پر شیڈول میں تبدیلی کا فیصلہ کیا گیا،اس کے علاوہ ملتان میں شدید گرمی کے باعث بھی شیڈول میں تبدیلی کی تجاویز تھیں۔
پی ایس ایل انتظامیہ نے براڈکاسٹرز کی درخواست پر غور کرتے ہوئے میچز کی نئی تاریخوں کا باضابطہ اعلان کر دیا ہے تاکہ نشریاتی اور لاجسٹک سہولتوں کو بہتر بنایا جا سکے۔
خیال رہے کہ اس سے قبل گزشتہ روز پہلگام واقعہ کے بعد پاک بھارت تعلقات میں کشیدگی کے سبب پاکستان سپر لیگ میں موجود بھارتی براڈکاسٹرز کو واپس انکے وطن بھیج دیا گیا تھا۔
دوسری جانب گزشتہ دنوں بھارت میں پہلگام واقعے کے بعد اسپورٹس اسٹریمنگ چینل فینکوڈ نے ہندوستان میں پاکستان سپر لیگ کی لائیو اسٹریمنگ کو معطل کرتے ہوئے ٹورنامنٹ سے متعلق ویڈیوز اور میچز کی جھلکیاں بھی ہٹادیں تھی۔