سوئیڈن : فائرنگ کے واقعے میں 3 افراد ہلاک 

اپسالا:سوئیڈن کے شہر اپسالا میں فائرنگ کے واقعے میں 3 افراد ہلاک ہوگئے، پولیس نے واقعے کی تحقیقات شروع کردی ہیں۔
غیر ملکی میڈیا رپورٹس کے مطابق پولیس نے حملہ آور کی تلاش شروع کردی ہے،اس سے قبل پولیس کا کہنا تھا کہ شہر کے مرکز میں فائرنگ کی آوازیں سن کر شہریوں نے واقعے کی اطلاع دی، جس کے بعد ایمرجنسی سروسز فوری طور پر موقع پر پہنچ گئی تھیں۔
 تفتیش کاروں کا کہنا ہے کہ تین افراد کی موت کی تصدیق ہو چکی ہے، پولیس واقعے کی تفتیش قتل کے طور پر کر رہی ہے۔
دوسری جانب واقعے کے عینی شاہدین کا کہنا ہے کہ پانچ گولیاں چلنے کی آواز سنی اور لوگوں کو چھپنے کے لیے بھاگتے ہوئے دیکھا۔
خیال رہے کہ اس سے قبل فروری میں سوئیڈن کے شہر اوریبرو میں ملک کی تاریخ کی سب سے ہولناک فائرنگ کے واقعے میں 10 افراد ہلاک ہو گئے تھے، جب ایک 35 سالہ بے روزگار شخص نے ایک تعلیمی مرکز میں طلبا اور اساتذہ پر گولیاں چلا دی تھیں۔