حوثیوں کا اسرائیلی ائیرپورٹ پر میزائل حملہ،8 افراد زخمی

تل ابیب: یمنی حوثیوںکی جانب سے اسرائیل کے بن گوریان ائیر پورٹ پر  بیلسٹک میزائل سے حملہ کیاگیا۔
غیر ملکی میڈیا کے مطابق حوثیوں کی جانب سے داغا گیا میزائل بن گوریان ائیرپورٹ کے احاطے میں آ گرا،جس کے نتیجے میں 8 افراد زخمی ہو گئے۔
میڈیا رپورٹس میںمزید بتایا گیا کہ میزائل حملے کے نتیجے میں ائیر پورٹ کی ایک سڑک اور گاڑی کو نقصان پہنچا اور فضائی آمدورفت عارضی طور پر معطل کر دی گئی، حملے میں 8 افراد زخمی ہوئے۔
حوثیوں کے عسکری ترجمان یحییٰ سریع نے اس حملے کے بعد ائیرلائنز کو خبردار کیا ہے کہ بن گوریون ائیرپورٹ اب فضائی سفر کے لیے محفوظ نہیں رہا۔
ترجمان نے مزید کہا کہ بیلسٹک میزائل نے اپنے ہدف کو کامیابی سے نشانہ بنایا اور امریکی اور اسرائیلی فضائی دفاعی نظام اسے گرانے میں ناکام رہے،ان کا کہنا تھا کہ میزائل حملے کے نتیجے میں 30 لاکھ سے زائد اسرائیلی میزائل حملوں سے بچاؤ کے لیے بنائے گئے شیلٹرز میں پناہ لینے میں مجبور ہوئے جبکہ ایک گھنٹے سے زائد وقت تک بن گوریون ائیرپورٹ بھی بند رہا۔
دوسری جانب اسرائیلی فوج نے تصدیق کی ہے کہ اتوار کی صبح داغے گئے میزائل کو روکنے کی متعدد کوششوں کے باوجود اسرائیلی دفاعی نظام اسے تباہ کرنے میں ناکام رہا۔
خیال رہے کہ یہ حملہ ایسے وقت میں ہوا ہے جب یمن میں امریکی فوج کی جانب سے روزانہ کی بنیاد پر بمباری جاری ہے۔