ڈرون حملوں کے بعد بھارتی فوجی تنصیبات کو نشانہ بنائیں گے، وزیردفاع کا واضح اعلان

اسلام آباد: وزیر دفاع خواجہ آصف نے کہا ہے کہ بھارت کی جانب سے ڈرون حملوں کے بعد یقینی طور پر کارروائی کی جائے گی جس میں پاکستان جواب میں بھارت کی فوجی تنصیبات کو نشانہ بنائے گا۔
غیرملکی خبر رساں ادارے رائٹرز کو انٹرویو دیتے ہوئے وزیر دفاع خواجہ آصف نے کہا کہ آج بھی بھارت کی جانب سے پاکستان پر ڈرونز سے حملہ کیا گیا، بھارتی ڈرون حملے نے پاکستان کے بھارت پر جوابی حملے کو ”مزید یقینی“ بنا دیا ہے،ان کا کہنا تھا حالیہ ڈرون حملوں سے پاک بھارت کشیدگی میں کمی کی گنجائش تقریباً ختم ہوگئی۔
انہوں نے بھارتی دعوے کی تردید کرتے ہوئے کہا کہ بھارتی ڈرونز سے لاہور کے دفاعی نظام کو کوئی نقصان نہیں ہوا، ان کا کہنا تھا کہ پاکستان جوابی کارروائی میں بھارتی فوجی تنصیبات کو نشانہ بنائے گا۔
خواجہ آصف کا مزید کہنا تھا کہ امریکا پاکستان اور بھارت کے درمیان کشیدگی کو کم کرنے کے لیے عالمی کوششوں کی قیادت کر رہا ہے۔
خیال رہے کہ 22 اپریل 2025 کو پہلگام میں سیاحوں کی ہلاکت کے بعد بھارت نے 6 اور 7 مئی کی درمیانی شب، اندھیرے میں پاکستان کے شہری علاقوں پر حملہ کرکے طبل جنگ بجادیا تھا۔