اگر بانی پی ٹی آئی سے ملنے نہ دیا گیا تو مریم نواز بھی نتھیا گلی اپنے گھر جا کر دکھائیں، علی امین

راولپنڈی :وزیراعلیٰ خیبر پختونخوا علی امین گنڈاپور نے دھمکی دیتے ہوئے کہا ہے کہ اگر انہیںبانی پی ٹہ آئی سے ملنے نہ دیا گیا تو مریم نواز بھی نتھیا گلی میں اپنے گھر نہیں جا سکیں گی۔
 تفصیلات کے مطابق بانی پی ٹی آئی سے آج کسی کو ملاقات کی اجازت نہ ملی ، خیبر پختونخوا کے وزیراعلٰی علی امین گنڈا پور  نجی فارماسیوٹیکل کمپنی کے سامنے ناکہ سے واپس روانہ ہو گئے۔ علی امین گنڈا اپور کو ملاقات کی اجازت نہ ملی۔ 
بانی پی ٹی آئی سے ملاقات کے لیے اڈیالہ جیل جاتے ہوئے روکے جانے پر میڈیا سے گفتگو کرتے ہوئے وزیراعلیٰ خیبر پختونخوا علی امین گنڈاپور نے کہا کہ عدالت نے مجھے توہین عدالت کے کیس میں ملاقات کی اجازت دی ہے، اگر ملنے نہیں دیا جاتا تو دوبارہ توہین عدالت کی درخواست دائر کروں گا۔
بانی پی ٹی آئی سے ملاقات کیلئے آئے ہوئے اراکین اسمبلی شاہد خٹک،جمال احسن خان بھی واپس روانہ ہو گئے،ان کے علاوہ مینا خان،معظم جتوئی،ذوالفقار خان،فتح اللہ برکی بھی ملاقات کے بغیر واپس روانہ ہو گئے ،پی ٹی آئی رہنماء گورکھ پور سے نجی ہاؤسنگ سوسائٹی کے راستہ واپس اسلام آباد روانہ ہوئے۔
انہوں نے کہا کہ میں صوبے کے سارے کام چھوڑ کر ملاقات کے لیے آیا ہوں۔ ملک میں قانون نام کی کوئی چیز نہیں۔ مجھے عمران خان سے ملاقات کی سب سے کم اجازت دی جاتی ہے جب کہ بانی پی ٹی آئی نے مجھے ملاقات کے لیے پیغام بھجوایا تھا۔
وزیر اعلی علی امین گنڈاپور کا کہنا تھا کہ مجھے عمران خان سے ملنے نہیں دیا گیا تو وزیراعلیٰ پنجاب مریم نواز بھی کے پی کے میں اپنے گھر نہیں جا سکتیں۔
واضح رہے کہ آج اڈیالہ جیل میں بانی پی ٹی آئی عمران خان سے ملاقات کا دن تھا تاہم وزیراعلی کے پی کو ملاقات کی اجازت نہیں دی گئی۔