مریم نواز کا ماحولیاتی تبدیلی سے نمٹنے کے لیے پنجاب میں جدید سائنسی مرکز قائم کرنے کا فیصلہ

لاہور:وزیراعلیٰ پنجاب مریم نواز شریف نےماحولیاتی تبدیلی سے نمٹنے کے لیے پنجاب میں جدید کلائمیٹ آبزرویٹری بنانے کی منظوری دے دی ہے۔
تفصیلات کے مطابق پنجاب میں جدید سائنسی مرکز قائم کرنے کا بھی فیصلہ کیا گیا ہے جس کیلئے بجٹ، آلات اور زمین کی فراہمی اور فزیبلٹی پلان تیار کر لیا گیا ہے۔
اس حوالے سےپنجاب کی سینئر وزیر مریم اورنگزیب کی زیرصدارت اجلاس میں یو ای ٹی لاہور نے کلائمیٹ آبزرویٹری کے قیام سے متعلق رپورٹ پیش کر دی۔
دوران اجلاس شرکاء کو بریفنگ دیتے ہوئے کہا گیا کہ انٹرن شپ پروگرام کے ذریعے ہر شعبے کیلئے ماحولیاتی ماہرین تیار کیے جائیں گے، جس سے  عالمی معیار کا پروفیشنل اسٹاف منتخب کیا جائے گا،آبزرویٹری میں جدید خود کار کمیونی کیشن سسٹم نصب کیا جائے گا، اس سے سائنسی تحقیق کے فروغ اور بین الاقوامی سطح پر ماحولیاتی معلومات کے تبادلے میں مدد ملے گی۔
اجلاس کے شرکاء کو بریفنگ میں بتایا گیا کہ جدید کلائمیٹ آبزرویٹری کے قیام کیلئے زمین کا قبضہ مل گیا ہے، جدید کلائمیٹ آبزرویٹری کی عمارت ای آئی سی ٹی میں تعمیر کی جائے گی۔
سینئر صوبائی وزیر مریم اورنگزیب نے کہا کہ ادارے کو جدید ترین مینجمنٹ ماڈل کے تحت چلایا جائے گا۔
انہوں نےمزید کہا کہ وزیراعلیٰ پنجاب مریم نواز نے ماحولیاتی تبدیلی کے خطرات سے نمٹنے کا پلان دیا ہے، آبزرویٹری کا قیام ماحولیاتی تحفظ سے متعلق بڑا قدم ہے۔