ایران اور اسرائیل کے درمیان بالا آخر ویسا ہی معاہد ہ ہو گا جیسا پاک بھارت کے مابین ہوا، ٹرمپ

واشنگٹن : امریکی صدر ڈونلڈ ٹرمپ کا کہنا ہے کہ ایران اور اسرائیل کو معاہدہ کرنا چاہیے،جیسا پاکستان اور بھارت کے مابین ہوا تھا ،ان کا کہنا تھا کہ دونوں ممالک کے درمیان جلد امن ہوگا۔

تفصیلات کے مطابق اپنے سوشل میڈیا پلیٹ فارم ٹروتھ سوشل پر جاری بیان میں ٹرمپ نے کہا کہ بہت ساری ملاقاتیں اور فون کالز ہو رہی ہیں، ایران اور اسرائیل معاہدہ کریں گے۔

ٹرمپ نے کہا کہ یہ ویسا ہی معاہدہ ہوگا جیسا میں نے بھارت اورپاکستان کے درمیان کرایا، پاکستان اور  بھارت کے معاہدے میں امریکا کےساتھ تجارت کی دلیل استعمال کی، 2 بہترین رہنماؤں سے بات کی جو فوری فیصلہ کرسکتے تھے اور سب کچھ رُک گیا۔

امریکی صدر کا کہنا تھا کہ میں بہت کچھ کرتاہوں مگر مجھےکبھی کسی چیز کا کریڈٹ نہیں ملتا لیکن کوئی بات نہیں، عوام سب سمجھتے ہیں۔
ٹرمپ نے اپنے بیان کے آخر میں کہا کہ ’مشرق وسطیٰ کو پھر سے عظیم بناؤ‘۔

ٹرمپ نےاپنی پہلی مدت صدارت کے دوران سربیا اور کوسووو اور مصر اور ایتھوپیا کے درمیان معاہدے کروانے کا بھی ذکر کیا۔

واضح رہے کہ اس سے قبل امریکا کے صدر ڈونلڈ ٹرمپ نے سوشل میڈیا پر جاری اپنے ایک پیغام میں کہا کہ آج رات ایران پر ہونے والے حملے میں امریکا کا کوئی کردار نہیں تھا،اگر ایران نے امریکا پر کسی بھی صورت میں حملہ کیا تو ہم اپنی فوجی طاقت کا بے مثال مظاہرہ کریں گے۔