ریڈیو اور ٹیلی وژن چینلز کے خلاف موصول ہونے شکایات پر اجلاس کا انعقاد

ڈاکٹر لبنیٰ ظہیر، چیئرپرسن پیمرا کونسل آف کمپلینٹس (پنجاب)، کی زیر صدارت کونسل کا ایک اہم اجلاس منعقد ہوا جس میں مختلف ریڈیو اور ٹیلی وژن چینلز کے خلاف موصول ہونے والی متعدد شکایات پر تفصیل سے غور کیا گیا۔ یہ اجلاس پیمرا کے ریجنل دفتر میں منعقد ہوا، جس میں کونسل کے اراکین اور متعلقہ فریقین نے شرکت کی۔

اجلاس کے دوران ان شکایات پر تفصیلی بحث کی گئی جو نشریاتی مواد کی خلاف ورزی، ضابطہ اخلاق کی عدم پاسداری اور چند میڈیا اداروں کی جانب سے پیشہ ورانہ اصولوں کی خلاف ورزی سے متعلق تھیں۔ کونسل نے ہر شکایت کو انفرادی طور پر سنا، اور شکایت کنندگان کے ساتھ ساتھ میڈیا اداروں کے نمائندگان کو بھی اپنے مؤقف پیش کرنے کا موقع دیا۔

تفصیلی غور و خوض کے بعد کونسل نے متعدد کیسوں پر فیصلے جاری کیے، متعلقہ اقدامات کی ہدایات دی گئیں اور پیمرا کو عمل درآمد کے لیے سفارشات بھیجی گئیں۔ اجلاس شفافیت، غیر جانبداری اور میڈیا ریگولیشن میں اعلیٰ اخلاقی معیار کے عزم کے ساتھ اختتام پذیر ہوا۔