امریکا کے بعد اسرائیل کا بھی جوہری تنصیب فردو پرفضائی حملہ،ایران کی تصدیق

تہران : امریکا کے بعد اسرائیلی ائیر فورس نے بھی کارروائی کرتے ہوئے ایران کی جوہری تنصیب فردو پرفضائی حملہ کر دیا جس کے بعد جوہری پلانٹ میں دھماکوں کی آوازیں سنائی دیں، جس کی ایرانی حکام نے تصدیق کر دی ہے۔

اسرائیل فوج کی جانب سے جاری کردہ بیان میں کہا گیا ہے کہ فضائیہ نے کامیاب کارروائی کرتے ہوئے ایران کی ایٹمی سائٹ فردو پر حملہ کیا ،جس سے جوہری تنصیب کو بھاری نقصان پہنچا ہے۔

اس سے قبل اسرائیلی فوج نے دعوی کیا تھا کہ اس نے ایران کے چھ ائیر بیسز پر کارروائی کرتے ہوئے 15 کے قریب ایرانی فضائیہ کے طیاروں کو تباہ کیا۔

 بیان میں مزید کہا گیا کہ ان حملوں میں ریموٹ کنٹرول طیاروں کے ذریعے ایران کے 15 طیاروں اور ہیلی کاپٹروں کو تباہ کیا گیا، ان حملوں میں رن ویز، زیرِ زمین بنکرز، ایک ایندھن بھرنے والا طیارہ اور ایرانی حکومت کے زیرِ استعمال ایف-14، ایف-5 اور اے ایچ ون طیاروں کو نقصان پہنچا ہے۔

اسرائیلی فوج نے دعویٰ کیا کہ اسرائیلی فضائیہ کے طیاروں نے ان ہوائی اڈوں سے پرواز کی صلاحیت اور ایرانی فوج کی فضائی طاقت کے آپریشن کو متاثر کیا ہے۔

دوسری جانب ایرانی حکام نےان حملوں کی تصدیق کر تے ہوئے بتایا کہ ایران کے شہر کرج اور تہران پر بھی میزائل حملے کیے گئے ہیںاور اسرائیلی حملوں کے بعد تہران میں زوردار دھماکے سنے گئے ہیں جبکہ شمالی تہران میں بجلی کی فراہمی منقطع ہو گئی ہے۔

اسرائیل نے ایران کے سرکاری نشریاتی ادارے کے ہیڈکوارٹر کو بھی نشانہ بنایا اور تہران میں یونیورسٹی پر بمباری کی۔ 

ادھر قم کے صوبائی عہدیدار نے اسرائیل کے فردو جوہری تنصیب کو نشانہ بنانے کی تصدیق کرتے ہوئے کہا کہ جوہری پلانٹ میں دھماکوں کی آوازیں سنائی دی ہیں۔

اس کے علاوہ ایرانی تسنیم نیوز ایجنسی نے یزد میں پاسداران انقلاب کے 10 اہلکاروں کے شہید ہونے کی تصدیق کی ہے۔