وزیر داخلہ محسن نقوی سے امریکی ناظم الامور کی ملاقات، دوطرفہ تعلقات اور علاقائی صورتحال پر تبادلہ خیال

وزیر داخلہ محسن نقوی سے پاکستان میں تعینات امریکہ کی قائم مقام سفیر نے اہم ملاقات کی، جس میں پاک-امریکہ تعلقات، مختلف شعبوں میں باہمی تعاون کے فروغ اور خطے کی بدلتی ہوئی صورتحال پر تفصیلی تبادلہ خیال کیا گیا۔

اس موقع پر آرمی چیف جنرل عاصم منیر کی حالیہ امریکی صدر سے ملاقات کے پس منظر میں بھی گفتگو کی گئی۔ وزیر داخلہ نے ایران اور اسرائیل کے درمیان جنگ بندی کے لیے امریکی صدر کی کوششوں کو سراہا۔

محسن نقوی نے کہا کہ توقع ہے امریکی صدر غزہ میں بھی جنگ بندی کے لیے مؤثر کردار ادا کریں گے۔ انہوں نے زور دیا کہ پاکستان ہمیشہ کشمیر سمیت تمام تنازعات کا پرامن حل چاہتا ہے اور مذاکرات کو ہی بہترین راستہ سمجھتا ہے۔

قائم مقام امریکی سفیر نے خطے میں قیام امن کے لیے پاکستان کے کردار کی تعریف کی اور کہا کہ امریکہ پاکستان کو ایک اہم شراکت دار تصور کرتا ہے، اور دوطرفہ تعلقات کو خصوصی اہمیت دیتا ہے۔