ایران اسرائیل جنگ: شہداء کی تعداد 900 سے متجاوز، خواتین و بچوں سمیت 935 افراد جاں بحق

ایران اور اسرائیل کے درمیان حالیہ جنگ میں شہید ہونے والے ایرانی شہریوں کی تعداد 900 سے تجاوز کر گئی ہے۔

ایرانی سرکاری میڈیا کے مطابق، 12 روزہ جنگ کے دوران کم از کم 935 ایرانی شہری شہید ہوئے، جن میں 132 خواتین اور 38 بچے بھی شامل ہیں۔ یہ اعداد و شمار ایرانی وزارتِ انصاف کے ترجمان کی جانب سے جاری کیے گئے۔

یاد رہے کہ 13 جون کو اسرائیل نے ایران پر فضائی حملوں کا آغاز کیا تھا، جن کے ابتدائی مرحلے میں ایران کے اعلیٰ فوجی افسران اور جوہری سائنسدانوں کو نشانہ بنایا گیا۔

اس کے ردعمل میں ایران نے اسرائیلی علاقوں پر جوابی میزائل حملے کیے، جن کے نتیجے میں اسرائیل میں 28 افراد ہلاک ہوئے۔

جنگ کے دوران امریکا بھی براہِ راست شامل ہو گیا اور اس نے ایران کی فردو، اصفہان اور نطنز میں واقع جوہری تنصیبات پر فضائی حملے کیے، جن کی مکمل تباہی کا دعویٰ بھی کیا گیا۔

بالآخر، 24 جون کو دونوں ممالک کے درمیان جنگ بندی طے پا گئی، جس سے خطے میں ایک اور بڑی جنگ کے امکانات وقتی طور پر ٹل گئے۔